DILI, 04 novembru 2022 (TATOLI)—Xefe suku Bemori, postu administrativu Vera Cruz, munisípiu Dili, Cristalina Pereira, hateten nia parte entrega ona lista kandidatu benefisiáriu ba Uma Kbiit Laek Plus (UKL+) 30-resin ba Programa Nasionál Dezenvolvimentu Suku (PNDS) hodi halo obsrervasaun ba komunidade nia kondisaun uma iha terrenu.
Notísia Relevante: MAE aprezenta planu “Uma Kbiit Laek Plus” ba Primeiru-Ministru
“Iha ami-nia Suku Bemori ba ema-ne’ebé atu hetan Uma Kbiit Laek Plus ne’e, entrega ona ba PNDS no PNDS ba haree hodi halo observasaun ba komunidade nia kondisaun liuliu uma iha terrenu. Maibé, ha’u rasik seidauk simu fali rezultadu observsaun hosi PNDS,” Cristalina Pereira hateten ba Agência Tatoli, iha nia kna’ar fatin, Bemori, Dili, sesta ne’e.
Hosi kandidatu 30-resin ne’e hira mak sai benefisiáriu ba UKL+ A no B, nia hatán, nia parte seidauk hatene klaru tanba to’o agora PNDS seidauk informa rezultadu avaliasaun, nune’e nia parte hein de’it rezulatdu hosi PNDS.
“Ha’u ho ha’u-nia povu ne’ebé kandidata ba UKL ne’e, ami hein de’it. Ha’u fiar, iha tempu besik ami simu rezultadu hosi PNDS kona-ba ema hira mak benefisiáriu ba UKL Plus ne’e,” nia dehan.
Orsamentu ne’ebé aloka ba programa Uma Kbiit Laek Plus (UKL+) ne’e hamutuk millaun $25.
Antes ne’e, Governu implementa ona projetu Uma Kbiit La’ek (UKL) ba família kbiit laek sira iha territóriu Timor-Leste ba tinan 2021 ho benefisiáriu hamutuk 1.254 ho montante orsamentu millaun $25.
Iha 2022, Governu liuhosi Ministériu Finansa aloka orsamentu besik millaun $8 atu kontinua programa refere maibé ida-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan ida-ne’e ho uma 4.000.
Ho nune’e, deputadu sira propoin tan osan hamutuk $63,600.000 hodi Ministériu Administrasaun Estatál (MAE) liuhosi PNDS bele implementa Uma Kbiit La’ek iha 2022, atu aumenta uma 10 kada suku, nune’e Governu prontu atu implementa programa ida-ne’e
Maibé iha tinan 2022, liuhosi orsamentu retifikativu introdús tan su- programa Uma Kbiit Laek Plus (UKL+) ho orsamentu millaun $25.
Notísia Relevante: Governu sei identifika uma-kain 6.000 sai benefisiáriu UKL+
Jornalista : Osoria Marques
Editór : Cancio Ximenes
