iklan

EKONOMIA, HEADLINE, LIFESTYLE, MUNISÍPIU, VIQUEQUE

MTKI lansa sítiu Bee Luli manas Viqueque ba publiku

MTKI lansa sítiu Bee Luli manas Viqueque ba publiku

Ministru Komérsiu, Turismu no Indústria (MKTI), José Lucas do Carmo da Silva hamutuk ho autoridade Viqueque lansa sítiu bee luli manas ba públiku. Imajen espesiál.

VIQUEQUE, 06 novembru 2022 (TATOLI)-Ministru Turismu Komérsiu no Indústria (MTKI), José do Carmo da Silva, ofisialmente lansa ona sítiu turismu Bee Luli Manas ho ninia orijen bee manas  ba publiku hodi asesu.

Ministru José do Carmo da Silva konsidera ne’e marka tán istória foun ba Bee Luli Manas tanba loke ona ba publiku sira hodi mai asesu fatin turismu ne’e.

“Ohin ita lansa ofisialmente fatin turismu Bee Luli Manas ne’e loke ba publiku sira hodi asesu. Iha fulan hirak liu ba ita halo ona hand over hosi Sekretaria Estadu Formasaun   no Empregu  (SEFOPE), momentu ne’ebá sira maka halo konstrusaun.  Tanba ne’e, ha’u hamutuk ho autoridade sira iha munisípiu Viqueqeu  loke ba publiku,” Ministru José do Carmo da Silva, hateten ba jornalista sira hafoin lansa sítiu Be Luli Manas, iha aldeia Miauai, suku Uaimori, postu Viqueque villa, sábadu ne’e.

Governante ne’e hatutan, MTKI sei kontinua akompaña sítiu turístiku Belu Luli Manas ninian moru protesaun no MTKI mós sei akompaña jestu hosi grupu Labadaen Kreativu ne’ebé envolve hosi joven Uaimori.

Nune’e mós hetan kooperasaun hosi MTKI apoia ona fundu liuhosi transferénsia públiku totál hamutuk $16.150.00 hodi grupu  Labadaen Kreativu konstrui fasilidade sira.

Notísia relevante: https://tatoli.tl/2022/05/15/pm-husu-komunidade-tau-matan-ba-we-lulik-manas-viqueque/

“Nune’e ba oin ministériu sei nafatin akompaña grupu Labadaen hodi apoia fundu ba grupu dezenvolve sítiu turístiku  Bee Luli Manaa,” governante ne’e akresenta.

Nia dehan, maske turismu Bee Luli Manas lansa ona ba publiku, maibé seidauk bele dada taxa tanba seidauk iha baze legál kona-ba taxa nian. Daudaun ne’e MTKI foin finaliza dekretu lei kona-ba taxa no sei aprezenta ba Konsellu Ministru.

“Maske ita lansa ona ba publiku, maibé ita seidauk bele dada taxa tanba ita seidauk iha baze legál hanesan dekretu lei retribuisaun. Daudaun ne’e ami  foin finalize dekretu lei ne’e no tempu badak sei lori ba Komsellu Ministru  hodi hetan aprovasaun,”  nia haktuir.

“Ministériu Turismu atu rezolve kestaun sira hanesan bee-moos, eletrisidade no Estrada. Nune’e Ministériu Turismu mós halo kooperasaun ho Ministériu Obra Públika (MOP)  hodi mai haree Estrada liga mai Bee Luli Manas nune’e ita espera tempu badak bele rezolve problema tolu ne’e,” nia hateten.

Iha fatin hanesan, xefe suku Uaimori, Francelino António Gomes, haktuir autoridade lokál sente kontente tanba fatin turismu Bee Luli Manas  MTKI lansa ona ba publiku nune’e vizitante sira bele vizita. Maibé Estrada maka sei kontinua difikulta vizitante sira.

“Ha’u husu ba vizitante sira ne’ebé mai vizita fatin sitiu Turismu Bee Luli Manas karik kuidadu ambiente labele soe lixu arbiru no kuidadu fasilidade sira-ne’ebé iha fatin ida-ne’e,” nia fó hanoin.

Koodernadór Grupu Labadaen Kreativu,  Júlio Gomes Guterres, dehan  ba oin sei halo jestaun di’ak tanba grupu iha ona estrutura hodi tau matan ba sítiu Bee Luli Manas ne’e.

“Ami sei organiza malu hodi asegura sítiu ida-ne’e. tanba ami hetan ona konfiansa hosi MTKI katak fatin turismu Bee Luli Manas ami maka sai responsável,” nia subliña.

Grupu Labadaen Kreativu hetan apoia orsamentu liuhosi tranferénsia públika ho montante hamutuk $16.150.00 hodi aloka ba atividade sira hanesan ikon  fatin foto hamutuk 10, barraka tradisionál lima, fatin da’an manu tolun rua, fatin kadoras ida, fatin suas ida ho pakote ida.

Enkuantu membru hosi Grupu Labadaen Kreativu totál hamutuk na’in-52 kompostu feto na’in-10 no mane na’in-42.

Partisipa iha serimónia lansa Bee Luli Manas ba publiku ne’e hetan partisipasaun hosi autoridade no komunidade sira iha postu Viqueque.

Jornalista: Vitorino Lopes da Costa

Editór       : Evaristo Soares Martins

iklan
iklan

Leave a Reply

iklan
error: Content is protected !!