OÉ-CUSSE, 07 novembru 2022 (TATOLI) – Rezultadu avaliasaun hosi Unidade Aprovizionamentu Rejiaun Administrativa Espesiál Oé-Cusse Ambeno (RAEOA) fó-sai katak, empreza internasionál PT. Hutama Karya mak sai manán-na’in ba projetu estrada nasionál hosi sub-rejiaun Pante Makasar liga ba sub-rejiaun Oésilo.
Valór orsamentu ba projetu estrada nasionál ne’e hamutuk millaun $33,591,867.00 hodi mellora estrada nasionál ne’e hosi Pante Makasar suku Cunha to’o fronteira Napan, suku Bobometo, sub-rejiaun Oésilo ho distánsia kilómetru 18, no fundu ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun serbisu durante tinan rua.
Notísia relevante: RAEOA hatuur fatuk dahuluk ba projetu estrada nasionál Pante Makasar-Nítibe
“Iha fulan ida-ne’e ita sei lansa projetu estrada nasionál Pante Makasar ba Oésilo, tanba parte aprovizionamentu publika ona rezultadu, empreza Hutama Karya mak manán entaun lansamentu sei halo iha 27 novembru 2022 hosi Primeiru Ministru Taur Matan Ruak,” Arsénio Paixão Bano, ko’alia iha otél Ambeno Oé-Cusse, segunda ne’e.
Tinan ne’e RAEOA hahú estrada nasionál boot rua, hosi Pante Makasar ba Nítibe pakote I to’o Oé-Nunu, suku Suni-Ufe, empreza Waskita Karya mak sei halo daudaun ne’e sei sukat hela. Nune’e estrada nasionál Tono mós kontinua hahú sukat daudaun.
Nia fó-sai katak, RAEOA aproveita marka prezensa Primeiru Ministru mai, atu halo mós inaugurasaun ba manutensaun estrada iha suku Bobokase ba Kutete, inaugura mós armazein aimoruk RAEOA ninian, nomos halo inaugurasaun ba laboratóriu iha Hospitál Referál Oé-Cusse.
Notísia relevante: Autoridade RAEOA prevee millaun $23 konstrui estrada hosi Pante Makasar to’o Nítibe
Jornalista: Abílio Elo Nini
Editór: Evaristo Soares Martins
