DILI, 07 novembru 2022 (TATOLI)–Ministru Obra Públika (MOP), Abel Pires da Silva, hateten, prosesu projetu konstrusaun estrada hosi munisípiu Baucau bá postu administrativu Quelecai, no postu administrativu Laga bá postu administrativu Baguia la’o daudaun maibé Governu hasoru difikuldade iha prosesu indemnizasaun.
“Ministériu antesipa kleur ona halo indemnizasaun ba populasaun no progresu ne’e di’ak, maibé ami iha problema oitoan atu ba halo pagamentu ba ita-nia inan-aman sira iha foho tanba banku sentrál ejize inan-aman sira atu loke konta bankária, ida-ne’e uza dokumentu rua hanesan billete identidade no kartaun eleitorál, enkuantu maioria inan-aman sira laiha dokumentu rua ne’e hotu,” Ministru informa iha resintu Parlamentu Nasionál, segunda ne’e.
Notísia relevante: Komunidade kontente Governu reabilita estrada Laga-Baguia
Nune’e, MOP halo hela negosiasaun hodi rezolve situasaun no bainhira halo identifikasaun, uma-kain afetadu ba projetu hamutuk 200 resin.
“Projetu estrada Laga-Baguia no Baucau-Quelicai fulan kotuk haruka ona ba Kámara Konta hodi autoriza pedidu vistu préviu no kuandu simu ona maka hahú ona halo lansamentu,” nia akresenta.
Antes ne’e, MOP prevee ona orsamentu ba indemnizasaun ba projetu estrada ne’e hamutuk millaun $3 iha Orsamentu Jerál Estadu (OJE) 2022.
Estrada Laga-Baguia sei ezekuta hosi empreza NORINCO International Corporation ho montante orsamentu millaun $21,7.
Jornalista : Antónia Gusmão
Editora : Julia Chatarina
