iklan

HEADLINE, MUNISÍPIU, VIQUEQUE

INFORDEPE no UNICEF kapasita profesór iha Viqueque kona-ba violénsia iha eskola

INFORDEPE no UNICEF kapasita profesór iha Viqueque kona-ba violénsia iha eskola

Atividade formasaun iha salaun Edukasaun Viqueque, Beloi, segunda (07/11). Imajen Tatoli/Vitorino Lopes da Costa

VIQUEQUE, 06 novenbru 2022 (TATOLI)–Institutu Nasionál Formasaun Dosente no Profisionál Edukasaun Timor-Leste (INFORDEPE) no Fundu Nasaun Unida ba Labarik (UNICEF, sigla inglés), segunda ne’e, fó kapasitasaun ba profesór ensinu báziku iha munisipiu Viqueque kona-ba violénsia iha eskola.

Xefe Ekipa no atuál Diretór Nasionál Administrasaun INFORDEPE, Valente Xavier, hateten, objetivu atividade ne’e hodi hapara violénsia iha eskola tanba durante ne’e akontese violénsia barak iha eskola no fatin públiku sira.

“Violénsia la’ós ema baku malu, la’ós ema insulta malu, maibé violénsia iha eskola kona-ba profesór sira-nia liafuan ne’ebé utiliza dalaruma kro’at, ida-ne’e mós kategoria violénsia. Tanba ne’e maka INFORDEPE serbisu hamutuk ho UNICEF hodi fó formasaun ba profesór sira,” Xefe Ekipa informa iha salaun Edukasaun Viqueque, Beloi.

Notísia relevante: UNTL-INFORDEPE realiza yudisium ba profesór baxarelatu 182 iha RAEOA

Formasaun ne’e daudaun realiza iha munisípiu Viqueque, Bobonaro, no Ermera hodi fó hanoin ba profesór sira atu redús violénsia iha eskola sira.

“Hosi formasaun sira-ne’e, profesór sira bele habelar koñesimentu ba ninia maluk profesór sira ne’ebé la tuir formasaun inklui komunidade,” nia akresenta.

Aleinde ne’e, inisiativa ne’e bele minimiza aktu violénsia sira iha eskola no bainhira profesór hanorin iha aula labele uza liafuan kro’at ba estudante sira maibé tenke uza liafuan sira-ne’ebé inspirativu hodi halo estudante sira iha vontade atu apreende no rona profesór sira-nia esplikasaun iha aula laran.

“Ita iha esperasa ida katak liuhosi formasaun ne’e sei minimiza aktu violénsia sira iha eskola. Ho meiu oin-oin hodi redús violénsia iha eskola no iha komunidade nia le’et iha futuru mai,” nia hato’o.

Atividade ne’e hala’o durante loron-neen, ne’ebé hetan partisipasaun hosi profesór ensinu báziku na’in-30 hosi postu administrativu lima iha munisípiu Viqueque.

Jornalista   : Vitorino Lopes da Costa

Editora         : Julia Chatarina

iklan
iklan

Leave a Reply

iklan
error: Content is protected !!