DILI, 07 novembru 2022 (TATOLI)–Ministru Asunu Kombatente Libertasaun Nasionál (MAKLN), Júlio Sarmento da Costa “Meta Mali”, hateten konstrusaun Monumentu 12 Novembru maske finaliza tarde maibé komemorasaun loron 12 novembru ba dala-31 (12 novembru 1991-12 novembru 2022) ne’e, tenke la’o nafatin.
Notísia Relevante: Komité 12 Novembru rekomenda MAKLN fó atensaun ba kompañia finaliza “Monumentu 12 Novembru”
“Komemorasaun 12 novembru tenke la’o, la’ós tanba konstrusaun Monumentu 12 Novembru finaliza mak foin la’o maibé la finaliza mós komemorasaun ne’e kontinua la’o. Ida-ne’e, ha’u hanoin laiha buat ida, ida-ne’e normál,” Meta Mali hateten ba Agência Tatoli, iha resintu Parlametu Nasionál, Dili, segunda ne’e.
Governante ne’e dehan, empreza esforsu hodi kontinua halo prosesu konstrusaun Monumentu 12 Novembru ne’e, no daudaun ne’e estende tan tinan ida hodi bele finaliza obra istóriku ne’e.
“Ita prolonga tan tinan ida tanba fallansu tékniku ba prosesu tama ba laran nian entre empreza, Komité 12 Novembru no dezeñu-na’in. Maibé pronto, buat hotu la’o di’ak fila-fali tanba ne’e mak ami prolonga fali prosesu ne’e,” Meta Mali dehan.
Projetu ne’e ezekuta hosi empreza Bobolait Unipesoál, Lda, ho orsamentu millaun $1,385, ne’ebé tuir kontratu konstrusaun hahú iha loron 23 setembru 2021no sei konklui iha loron 22 setembru 2022. Maibe tanba seidauk konklui entaun Governu hanaruk kontratu konstrusaun to’o tinan 2023.
Jornalista : Osória Marques
Editór : Cancio Ximenes
