DILI, 04 novembru 2022 (TATOLI)—Komité 12 Novembru rekomenda ba Ministériu Asuntu Kombatente Libertasaun Nasionál (MAKLN) atu fó atensaun ba kompañia hodi finaliza konstrusaun monumentu 12 Novembru iha semitériu Santa Cruz Dili.
Notísia Relevante: Konstrusaun monumentu 12 Novembru la’o neineik tanba fallansu tékniku
“Ami hosi Komité 12 Novembru rekomenda ba MAKLN tenke fó atensaun ba kompañia, tanba ne’e Estadu nian, ami la hakat liu ba kompañia. Tanba, ita tenke liuhosi Governu, depois liu ba MAKLN para ezije kompañia bele iha responsabilidade no Governu mós tenke kumpre kompañia nia hakarak, rua ne’e tenke servisu hamutuk,” Prezidente Komisaun Organizadora ba tinan 31 Masakre Santa Crúz, Rogério Castro da Crúz, hateten ba jornalista sira iha nia knaar fatin, Díli, sesta ne’e.
Tuir nia, kona-ba kompañia Bobolait ne’ebé halo hela Monumentu 12 Novembru ba Masakre Santa Crúz nian, loloos Governu liuhosi MAKLN tenke tau atensaun másimu ba kompañia refere, tanba ne’e Estadu nia responsabilidade,
Komité 12 Novembru, nia dehan, só akompaña no tau matan de’i, maibé atu foti desizaun loloos iha Estadu liu-liu ba MAKLN tenke bolu atensauan ho prázu ne’ebé fó ona ba kompañia refere hodi konstrui monument refere.
“Maibé, ita haree hanesan prázu liu ona, aumezmu tempu Komisaun Organizadora mós fó ona karta antes 27 outubru, tanba komemorasaun loron Saudozu Max Stahl no Saudozo Sebastião Gomes nian, entaun ita ezije kompañia atu bele hamoos fatin sira-ne’ebá, maibé la konsege tanba nia só ateru no taka de’it dalan no depois fó espasu ba ema la’o. Maibé, loloos ne’e ramata ona, hanesan kalen no rai bou sira ne’e ami lakohi haree ona, tanba ami hakarak hamoos tiha hanesan tinan kotuk sira-ne;e atu halo eventu loron nasionál ba juventude nian. Entaun, ami koko halo nafatin karta ba Diretór Kompañia Bobolait nune’e antes loron 09 iha ne’ebá (Semitériu Santa Crúz) tenke moos ona,” nia dehan.
Hosi ne’e, sesta (04/11) ohin, komisaun tenke ba hasoru Prezidente Munisípiu Díli halo ligasaun ho MAKLN nune’e bele fó hanoin ba kompañia atu bele kumpre skarta ne’ebé komisaun organizadora fó ba.
Maske nune’e, nia esplika, prosesu akompañamentu ba konstrusaun Monumentu 12 Novembru, Komité 12 Novembru no MAKLN ba haree nafatin maibé Komité triste uitoan tanba MAKLN ba hela maibé dala ruma haluha tiha ho durasaun tempu ne’ebé Estadu fó ba kompañia.
” MAKLN tenke husu klarifikasaun hosi kompañia no kompañia mós tenke esplika razaun tanbasá mak tarde no iha impaktu ruma tenke fó esplikasaun atu Komité no públiku bele hatene. Dala ruma orsida bele dehan katak, Komité no Estadu mak impede fali, ida ne’e hanesan kesar malu fali, entaun buat ne’e laloos. Kompañia tenke haree katak tempu no durasaun ne’ebé Estadu fó, nia tenke kumpre,” nia hateten.
Ba prosesu konstrusaun Monumentu 12 Novembru ne’e, tuir Komite 12 Novembru nia haree agora daudaun atinje ona 55%, tanba loloos portaun oan ne’e de’it no leten ne’e bele hotu no taka ona no mós halo portaun hamriik loos ona.
“Agora foin mak harii lolos de’it no ida leten seidauk, entaun konta ba prosesu ne’e foin atinje 55%, tanba leten ne’e seidauk hotu,” nia dehan.
Jornalista : Nelia Fernandes
Editór : Cancio Ximenes
