DILI, 04 outubru 2022 (TATOLI) – Ministru Asuntu Kombatente Libertasaun Nasionál (MAKLN), Júlio da Costa, hateten konstrusaun monumentu 12 Novembru seidauk konklui tanba mosu fallansu tékniku, nune’e sei prolonga tan.
“Kona-ba konstrusaun monumentu 12 Novembru iha Santa Cruz, hanoin sei prolonga tanba fallansu tékniku ne’ebé rezulta nia konstrusaun la’o neineik maibé ita konsidera prosesu kontrusaun ne’e sei kontinua la’o”, Meta Mali, hateten ba jornalista sira, iha salaun MAKLN Caicoli, ohinn.
Antes ne’e, Sekretáriu Estadu Asuntu Kombatente Libertasaun Nasionál (SEAKLN), Júlio de Oliveira “Loro Mesak”, preokupa kontratu ba projetu ne’e ho durasaun tinan ida maibé to’o tempu mak seidauk finaliza bele prolonga.
“Neneik ne’e iha empreza, tanba ne’e mak ami bolu atensaun ona ba empreza ne’ebé ezekuta obra no sira hasoru ona ami, maibé sira hateten katak tinan-ne’e seidauk bele finaliza, entaun ami husu sira tenke finaliza iha tinan oin”, nia solisita.
Nia haktuir bainhira bolu jerente empreza hodi klarifika, empreza aprezenta razaun katak téknikamente sira fraku atu aselera projetu ne’e maibé promete tinan oin bele finaliza.
“Ami labele esklui sira tanba sira agora kontinua hela serbisu maske neneik, ne’ebé husik sira halo serbisu maibé fó hanoin ba sira atu aselera serbisu lalais”, revela.
Projetu ne’e ezekuta hosi empreza Bobolait ho orsamentu millaun $1,385, ne’ebé tuir kontratu konstrusaun hahú iha loron 23 setembru 2021 no sei ramata iha loron 22 setembru 2022.
Jornalista: Osória Marques
Editór : Zezito Silva