iklan

NASIONÁL, HEADLINE, KAPITÁL

Projetu reabilitasaun estrada Rotunda Comoro to’o Raikotu sei iha negosiasaun

Projetu reabilitasaun estrada Rotunda Comoro to’o Raikotu sei iha negosiasaun

Ministru Obra Públika, Abel Pires da Silva. Imajen Tatoli/Francisco Sony

DILI, 07 novembru 2022 (TATOLI)–Ministru Obra Públika (MOP), Abel Pires da Silva, hateten projetu konstrusaun estrada Rotunda Comoro to’o Raikotu, munisípiu Dili, seidauk implementa tanba sei iha prosesu negosiasaun.

“Ami halo hela negosiasaun tanba ne’e hosi parte fundu empréstimu, bainhira ita kontinua ho ida-ne’e entaun ita tenki halo buat barak molok hadi’a,” Ministru informa iha resintu Parlamentu Nasionál (PN), segunda ne’e.

Notísia relevante: KAFI diskute aselera projetu alargamentu estrada Rotunda Comoro to’o Tasi-tolu

Tuir governante ne’e, tenke hadi’a lisensa ambientál tanba hanesan rekerimentu hosi Banku Dezenvolvimentu Aziátiku (ADB, sigla inglés) hodi halo empréstimu.

Aleinde ne’e, tenki rezolve kondisaun sosiál sira hanesan Eskola São Miguel, ne’ebé prosesu sira ne’e mak halo tarde projetu.

“Bainhira tuir nafatin empréstimu, entaun progresu ba projetu ne’e sei kleur, maibé ita bele husu atu dada mai uza fundu infraestrutura de’it. MOP hakarak dada mai uza de’it fundu infraestrutura no daudaun halo hela koordenasaun ho Ministériu Finansa tanba nia mak instituisaun ne’ebé liga diretamente ho banku atu halo negosiasaun, ne’ebé hein katak Ministériu Finansa bele koordena,” nia akresenta.

Projetu reabilitasaun estrada ne’e ho distánsia kilómetru 1,2, ho orsamentu millaun $5 hosi empréstimu.

“Estrada hosi Raikotu bá Tasi-tolu ne’e agora la’o hela, la kleur tan fui aspál, ne’ebé oitoan tan kaber ona,” Ministru orimista.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!