iklan

EDUKASAUN, HEADLINE, MUNISÍPIU, OÉ-CUSSE (RAEOA), POLÍTIKA

RAEOA halo avaliasaun hodi hametin liña koordenasaun ba futuru

RAEOA halo avaliasaun hodi hametin liña koordenasaun ba futuru

RAEOA avalia atendimentu suku hametin liña koordenasaun hodi mellora iha futuru. Imajen Tatoli/Abílio Elo Nini.

OÉ-CUSSE, 07 novembru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda ne’e realiza avaliasaun progresu serbisu hosi nível sub-rejionál, suku to’o aldeia.

Atividade avaliasaun ne’e lidera hosi Sekretáriu Rejionál ba Asuntu Administrasaun, Martinho Abani Elo, informa, objetivu hosi avaliasaun ne’e atu mellora liña koordenasaun no atendimentu serbisu mai hosi sub-rejionál, suku no aldeia, nune’e mós kada membru autoridade aprezenta progresu serbisu durante tinan ida, hahú janeiru to’o novembru tinan ne’e.

“Avaliasaun tinan ne’e sai referénsia kompara ho tinan kotuk, tanba liña koordenasaun importante tebes hosi nível sub-rejiaun to’o iha aldeia nune’e bele mellora di’ak liután atendimentu serbisu iha baze,” Martinho Abani Elo, ko’alia iha otél Ambeno Oé-Cusse.

Tuir nia, tanba serbisu hotu konsentra iha nível sub-rejiaun suku to’o aldeia, dalaruma atividade sira mai hosi membru autoridade implementa iha baze hanesan edukasaun saúde, infraestrutura bázika ladún atensaun másimu, entaun oportunidade ne’e importante tebes ba ita hotu, hosi kada Sekretáriu Rejionál sira atu hato’o progresu servisu ba ita hotu nune’e bele hametin liutan liña koordenasaun no komunikasaun ba futuru bele hadi’a.

Atividade avaliasaun ne’e abertura direitamente hosi Prezidente Autoridade RAEOA, Arsénio Paixão Bano, informa, avaliasaun ne’e presiza realiza nune’e autoridade komunidade no konsellu suku iha koñesimentu ba futuru bele partisipa hodi kontribui ba prosesu dezenvolvimentu iha Oé-Cusse.

“Ita agora ne’e esforsu atu forma ema Oé-Cusse atu sai lideransa hodi lidera rai Oé-Cusse ne’e ho di’ak, tanba ita laiha tempu deskansa, tán ne’e maka ita komesa tún beibeik ba suku sira, tinan oin ita hahú ona ho jestór sira, tanba rai ne’e labele atraza ho dezenvolvimentu, tanba autoridade nia hakarak ema hotu tenke partisipa para halo rai ne’e nia dezenvolvimentu lais liután,” Arsénio Paixão Bano hateten.

Nia haktuir, avaliasaun ne’e hodi avalia orsamentu 2022 millaun $84 no tinan oin 2023 sa’e ba millaun $120, maibé hakarak ne’e suku sira envolve hotu nune’e halo rai ne’e la’o lais.

“Iha tinan rua nia laran hahú 2021 to’o tinan ne’e buat barak ita halo ona iha Oé-Cusse, eskola ita harii iha fatin hotu-hotu eletrisidade tama ona iha fatin izoladu sira, estrada rurál ita halo haleu hotu sub-rejiaun haat, bee-moos, gabiaun no projetu seluk tán, tán ne’e iha tinan ne’e ita hahú tán ho projetu estrada nasionál hosi Pante Makasar liga ba sub-rejiaun Oésilo no Nítibe,” nia afirma.

Entretantu, partisipa iha atividade avaliasaun ne’e mai hosi Sekretáriu Rejionál sira, Diretór no Xefe Departamentu, Ofisiál Polísia Suku (OPS), xefe suku 18 hamutuk ho estrutura suku.

Joranlista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!