CJM Bobonaro distribui $4.500 ba USPA neen hodi komemora 12 novembru
BOBONARO, 08 novembru 2022 (TATOLI)-Sentru Juventude Munisípiu (CJM, sigla portugés) Bobonaro, sesta ne’e asina aakordu serbisu hamutuk hodi distribui orsamentu hamutuk $4,500 ba membru Unidade Servisu Postu Administrativu (USPA) neen hodi komemora loron istóriku Masakre Santa Cruz, 12 Novembru ba dala-31 ho sub tema ‘Juventude pasadu, agora no futuru’.
Diretor CJM Munisípiu Bobonaro, Alcino Lopez, informa orsamentu ne’e aloka hosi Sekretaria Estadu Juventude no Desportu (SEJD) hodi distribui ba postu administrativu Atabae $500, Balibo $7.50, Cailaco $7.50, Maliana $7.50, Bobonaro $1.000 no postu administrativu Lolotoe $7.50.
Notísia relevante: SEJD aloka orsamentu ba Sentru Juventude Bobonaro komemora 12 novembru
“Orsamentu ne’e ita distribui bazea ba proposta sira-ne’ebé postu sira submete mai, entaun proposta sira-ne’e ami haree ba tuir duni ninia padraun ami aprova, agora ita distribui osan hamutuk $4.500, maibé postu sira simu la hanesan tanba haree liu ba númeru suku,” nia informa ba jornalista sira, iha Maliana.
Alcino husu ba Komisaun Organizadora postu administrativu sira atu ezekuta osan estadu ne’e ho di’ak nune’e atividade komemorasaun 12 novembru bele la’o ho susesu iha idak-idak nia fatin.
“Ita distribui atu selebra ita-nia loron istóriku masakre Santa Cruz 12 Novembru atu dignifika ita-nia erói sira-ne’e sakrifika sira-nia vida ba libertasaun nasionál,” Alcino hatutan.
Sekretáriu Autoridade Munisípiu Bobonaro, João do Carmo de Fátima, enkoraja komisaun organizadora sira atu fó kontribuisaun másimu no labele haree de’it mak valór orsamentu ne’ebé Governu Sentrál aloka.
“Ita hala’o atividade ne’e pelumenus ema dehan bonitu oituan atu nune’e ema bele sura, tanba uluk ita-nia maun sira mós ema sura mak ohin loron rekoñese rai ne’e sai ukun-aan,” nia katak.
João do Carmo prefere Komisaun Organizadora Sira realiza atvidade retiru akumula joven sira-ne’ebé envolve iha grupu arte-marsiál no arte rituál sira nune’e bele banati tuir saida mak juventude pasadu sira halo hodi kontribui ba prosesu ukun rasik-aan.
Sorin seluk, Koordendor mate restu 12 Novembru munisipiu Bobonaro, Mateus Guterres Henriques, agradese Governu liuhosi SEJD, maske ho orsamentu limitadu maibé bele kontinua apoia hodi komemora loron istóriku ne’e.
“Tinan ne’e komesa selebra iha postu tanba iha orsamentu atubele komemora 12 novembru,” nia akresenta.
Notísia relevante: Masakre 12 Novembru, feto sira terus liu mane
Jornalista : Sérgio da Cruz
Editór : Evaristo Soares Martin
