iklan

NASIONÁL, POLÍTIKA

Durante tinan 20, TL lakon tempu kria baze ekonomia

Durante tinan 20, TL lakon tempu kria baze ekonomia

Deputadu PD, Adriano do Nascimento. Foto TATOLI

DILI, 08 novembru 2022 (TATOLI)—Deputadu Partidu Demokrátiku (PD), Adriano do Nacimento, hateten durante tinan 20 nia laran ne’e Timor-Leste (TL) lakon tempu kria baze ekonomia ne’ebé forte no sustentável iha nasaun ne’e.

“Timor-Leste lakon ona tempu no oportunidade durante tinan 20 nia laran atu kria baze ekonomia nasaun ne’ebé forte no sustentável iha nasaun ne’e. Basa, durante tinan 20 nia laran, ita líder polítiku sira lakon tempu hodi haksesuk malu no hatun malu, tamba atu define identidade polítika partidária hodi tane aas orgullu pesoál no grupu,” nia hateten liuhosi debate proposta-lei Orsamentu Jerál Estadu (OJE) 2023 iha faze jeneralidade loron daruak iha PN, tersa ne’e.

Prátika polítika hatudu katak, líder polítiku balun, reklama ka proklama katak projetu investimentu estratéjiku ba nasaun hanesan projetu tasi mane no akordu fronteira marítima, partidu ida-nia obra de’it hodi hatuur sira-nia urgullu pesoál no grupu.

Nune’e mós projetu investimentu estratéjiku seluk hanesan estrada, ZEESM no Portu Tibar, reklama katak partidu seluk nia obra.

“Tamba orgullu pesoál no grupu ba obra komun hirak ne’e mak halo líder polítiku sira satán malu iha siku no hamonu malu iha dalan klaran hodi halakon prinsípiu sentidu Estadu no kontinuidade Estadu,” nia hateten.

Aktu polítiku hirak ne’e mós mak kontribui ona ba estagnasaun kresimentu ekonómiku, haboot dezempregu no ki’ak, reseita ba Estadu la’o hakdasak hela tanba la fó atensaun másimu hodi hatuur polítika ba investimentu produtivu, kualidade edukasaun menus hela tamba ladun tau atensaun másimu ba polítika edukasaun hodi hatuur fasilidade adekuadu no forma tékniku profisionál kualifikadu hodi forma ema sai ema ba preparasaun futura jerasaun.

Má-nutrisaun no mortalidade aas tamba ladún tau prioridade hodi hatuur fasilidade no medikamentu modernu prepara tékniku profesionál hodi kuida povu nia moris.

“Timor-Leste lakon ona oportunidade durante tinan 20 nia laran atu hatuur no hametin baze ba produtividade umana, ekonómika no finanseira hodi haboot Produtu Internu Brutu (PIB) nasaun nian. Basa, líder polítiku sira iha tendénsia polítika atu habo’ot PIB ho despeza públika tamba osan mina nian suli daudaun iha ita-nia liman, loos duni PIB ho baze despeza públika la fó serteza absoluta ba estabilidade no sustentabilidade krezimentu PIB ka kresimentu ekonómiku nu’udar indikadór ba kresimentu ekonomia nasaun,” nia hateten.

Deputadu hosi bankada opozisaun ne’e, destaka mós kestaun daruak kona-ba lala’ok dezempeñu governasaun VIII Governu Konstitusionál nian iha tinan 2022 ladún hatudu esperansa boot ba povu no nasaun ne’ebé tuir dadus taxa ezekusaun orsamentu to’o loron 07 fulan-outubru to’o de’it 41,7%, Governu introdús polítika orsamentu por programa, ne’ebé ezekusaun programa no orsamentu.

“Se taxa ezekusaun orsamentu ki’ik oinsá mak ezekusaun programa boot liu fali orsamentu ho nia impaktu sai extra-ordináriu nu’udar indikadór ba progresu no susesu. Dadus estatístiku hatudu ezekusaun ba setór ne’ebé fó impaktu bootliu ba públiku hanesan: fundu infraestrutura foin atinje 17,7%, kapitál dezenvolvimentu 25,3%, orsamentu transferénsia públika foin ezekuta 36,7%,” nia kestiona.

Ligadu ho proposta OJE 2023, nia parte aseita ho planu ba despeza ho montante 3.155.715.306 no aseita ho lema ne’ebé Governu haktuir katak investimentu produtivu no kresimentu inkluzivu ba futuru jerasaun no aseita ho programa prioridade VIII Governu nian ne’ebé dehan mobilizasaun reseita doméstika no introdusaun inisiativa fiskál foun.

Maske nune’e, nia argumenta pensamentu lójiku aritmétikamente reseita doméstika sei labele mobiliza ho másimu, inisiativa fiskál foun mós sei labele materializa ho di’ak iha tinan fiskál 2023.

Ho razaun fundamentál tolu hanesan alokasaun orsamentu ba setór produtivu ki’ik liu no la to’o 2% hanesan tuir orsamentu ba investimentu no diversifiksaun ekonómika aloka de’it 1,21%, orsamentu ba agrikultura 1,09%, orsamentu ba setór turizmu aloka de’it 0,26%, orsamentu ba teknólojia informasaun no komunikasaun aloka 0,80%.

Aleinde alokasaun orsamentu ba formasaun téknika no profisionál la to’o 5% hanesan tuir mai orsamentu ba edukasaun aloka de’it 4,77%, orsamentu ba formasaun profisionál aloka de’it 0,03%, orsamentu ba formasaun tékniku aloka de’it 0,11%.

Nune’e mós, orsamentu ba polítika kuida vida umana la to’o 4% hanesan tuir mai orsamentu ba setór saúde aloka de’it 3,27% no orsamentu ba bee no saneamentu aloka de’it 0,97%.

“Haree ba ida-ne’e husu ba oinsá mak VIII Governu bele mobiliza reseita doméstika no introdús insiativa fiskál foun se alokasaun orsamentu ba setór ne’e, ha’u-nia dúvida nu’udar opozisaun no esperansa nu’udar deputadu,” nia hateten.

Hatán ba ida-ne’e, Primeiru-Ministru (PM), Taur Matan Ruak, hateten reflesaun ne’e importante tebes.

“Primeiru ha’u hakarak hateten gosta loos intervensaun sira hosi deputadu iha ne’e asuntu rua. Ida, kona-ba polítiku prosesu hotu tantu polítiku no sosiál ne’e ita ema mak lidera, tanba ita ema mak lidera iha problema. Rua, normalmente ita enfrenta exersísiu ita-nia funsaun ida mak bolu soke personalidade ne’e sei ita la kontrola ita-nia an ne’e, ita kria problema. Atu evita labele iha, primeiru, prinsípiu observa mak respeitu importante no segundu bainhira respeitu iha,diálogu iha mak armonia iha, nune’e armonia iha kooperasaun iha kuandu kooperasaun iha prosperiedade,” nia hateten.

Nasaun demokrátika ne’e normál no soke ne’e ema hotu-hotu tenke tau matan no tenke hatene katak buat loos ne’e la’ós ema ida-nian tanba la pertense ba ema ida, no kuandu ema rekuiñese ida-ne’e signifika aseita opiniaun ema seluk nian.

“Segundu verdade hotu-hotu ne’ebé ita buka só em-funsaun ba ita-nia povu no nasaun maibé kuandu ba ita-nia an ita laiha entendimentu ba malu,” nia hateten.

Primeiru-Ministru dehan, kona-ba sustentabilidade só eziste se buat ne’ebé Timor-Leste gasta menus buat ne’ebé TL prodús tanba TL nia razaun la’ós ida-ne’e.

“Nia gasta barak liu fali buat ne’ebé tama, nune’e eziste sustentabilidade lae, la eziste, saida mak ita halo ezersísiu, nune’e ba oin asegura posibilidade extensaun vida ita-nia fundu nian,” nia hateten.

Notísia Relevante: OJE 2023 kontinua estimula ekonomia

Jornalista : Nelson de Sousa

Editór     : Cancio Ximenes

iklan
iklan

Leave a Reply

iklan
error: Content is protected !!