DILI, 08 novembru 2022 (TATOLI)—Ministru Transporte no Komunikasaun, José Agustinho da Silva, hateten, Governu asina ona akordu servisu aéreu (ASA, sigla inglés) ho nasaun sira hanesan Emiradu Árabe Unidu, Qatar, Nova Zelándia, Kambódia no Brunei Darusalam.
“Hosi akordu hirak ne’e, akordu servisu aéreu ho Emiradu Árabe Unidu mak hetan ona ratifikasaun hosi Parlamentu Nasionál. Hirak ne’ebé sei iha prosesu maka akordu servisu aéreu entre Timor-Leste ho Xina, Malázia, Quait, Turkia, Filipina, no Portugal,” Ministru hateten iha Parlamentu Nasionál (PN), tersa ne’e.
Aleinde ne’e, balun iha prosesu nia laran no balun tama ona ba faze finál, hein atu formaliza liuhosi asinatura.
“Konsellu Ministru atribui ona poder ba Ministru Transporte no Komunikasaun (MTK) atu asina akordu servisu aéreu ho Xina no Portugal. Bainhira asina ona tenki lori ba Parlamentu Nasionál atu ratifika,” nia akresenta.
Notísia relevante: Governu aprova akordu servisu aéreu rua
Durante ne’e MTK liuhosi Autoridade Aviaun Sivil Timor-Leste (AACTL, sigla portugés) trata hela akordu servisu aéreu ho Indonézia, Austrália no Singapura.
“Akordu ne’e hanesan Timor-Leste ho Austrália foin daudaun mak ratifika, naturalmente ita iha de’it akordu servisu aéreu. Ita seidauk iha akordu ne’ebé nu’udar instrumentu implementasaun akordu ne’e rasik, foin daudaun trata mós akordu, nune’e Parlamentu Nasionál ratifika bazeia ba ida-ne’e maka Governu Austrália dezigna aviaun QANTAS hodi halo ligasaun aéreu entre Timor-Leste ho Austrália,” nia esplika.
Akordu servisu aéreu ho Indonézia no Singapura hetan ona aprovasaun hosi Konsellu Ministru, nune’e lori mai PN atu ratifika.
Jornalista : Antónia Gusmão
Editora : Julia Chatarina
