VIQUEQUE, 08 novembru 2022 (TATOLI)–Ekipa hosi Ministériu Ensinu Superiór no Kultura (MESSK) hahú rejista estudante finalista tinan 2018-2021 ba rejime espesiál hodi asesu ba Universidade Nasionál Timor-Lorosa’e (UNTL) no Institutu Politékniku Betano (IPB).
“Prosesu rejista finalista kada tinan realiza. Hosi programa sira-ne’e ami hahú simu estudante foun hahú loron 07 to’o 11 novembru. Daudaun ne’e ita rejista maka rejime espesiál,” Xefe Ekipa, João Baptista, hateten iha edifísiu edukasaun Viqueque, Beloi, tersa ne’e.
Nia dehan, kritériu ba prosesu rejistu ba rejime espesiál maka hanesan diploma sekundáriu, kartaun eleitorál ka billete identidade inklui foto 3×4.
“Atu asesu ba rejime espesiál, estudante sira tenke hetan valór 7 ba leten, valór mínimu 6, maibé ita haree fali ba asuntu seluk hanesan veteranu sira-nia oan. Buat sira-ne’e ita sei haree tuir regulamentu sira ne’ebé ami iha. Oportunidade ida-ne’e ita fó ba estudante hosi tinan 2018 to’o 2021,” nia akresenta.
Notísia relevante: KFP-MEJD disemina informasaun ba profesór iha Baucau kona-ba rejime espesiál
Nune’e, nia husu ba estudante sira atu halo rejista, tanba hanesan oportunidade di’ak ba estudante sira hodi asesu ba UNTL no IPB.
Tuir kalendáriu, prosesu teste ba estudante rejime espesiál sira sei tuir ezame loron 30 novembru.
Jornalista : Vitorino Lopes da Costa
Editora : Julia Chatarina
