DILI, 08 novembru 2022 (TATOLI)—Koordenadór Jerál Unidade Kooperasaun Parseria (UKP) iha Ministériu Solidariedade Sosiál no Inkluzaun (MSSI), João Coimbra, hateten pagamentu subsídiu $200 ba uma kain, posibilidade sei iha alterasaun ba dekretu-lei tanba mosu opiniaun ne’ebé diferensa iha públiku.
“Loos duni, ita halo tentativa ida hodi halo lansamentu ba pagamentu subsídiu $200 iha loron 16 novembru tinan ne’e maibé mosu opiniaun oioin iha sosiedade. Entaun, ida-ne’e hatudu posibilidade mosu aletrasaun ba dekretu-lei, hodi hein rezolusaun promulgasaun. Uma vês que nia promulga ho kualker kondisaun ne’ebé estabelese iha dekretu-lei sekretariadu tékniku adapta de’it,” João Coimbra hateten ba Agência Tatoli, iha nia kna’ar fatin MSSI Caicoli, Dili, tersa ne’e.
Koordenadór jerál ne’e hatutan, ida-ne’e sei implika mós ba tentativa kalendáriu lansamentu pagamentu refere iha 16 novembru tinan ne’e.
João Coimbra sublina tan maibé ida-ne’e hein katak Prezidente Repúblika, José Ramos Horta promulga semana ne’e entaun di’ak maibé promulga fali iha semana oin mak signifika sei halo ajustamentu foun fali.
Mezmu iha opiniaun oioin mosu iha siénsia, nia dehan, to’o agora xefe Estadu seidauk haruka karta legál ida kona-ba aletrasaun dekretu-lei ne’e, maibé unidade legál tékniku MSSI nian hamutuk unidade legál Prezidente KOnsellu Ministru (PCM, sigla portugés) nia possibilidade halo halo aletrasaun.
“Ida-ne’e signifika iha ona kondisaun hodi altera dekretu-lei tanba ita-nia Prezidente Repúblika rasik inklui entidade balun no sosiedade sivil nia opiniaun, entaun iha ona posibilidade atu halo alterasaun,” nia esplika.
Husu kona-ba bainhira mak altera dekretu-lei ne’e no posibilidade sei avansa ho dekretu-lei anterior, nia hatán, parte hotu-hotu hein de’it tanba agora seidauk iha desizaun.
“Parese halai ba ne’ebá maibé ita hotu hein tanba ha’u-nia liman mós seidauk iha esbozu lei ida. Espera katak redasaun finál ne’ebé unidade tékniku MSSI ho unidade PCM sei aprezenta ne’e bele akomoda mós saida mak Prezidente Repúblika ho sosiedade sivil sira hakarak. Maibé, redasaun liga ho dekretu-lei ne’e, seidauk iha serteza,” nia hateten.
Aleinde ne’e, ekipa tékniku mós halo hela preparasaun hodi fó formasaun ba funsionáriu no ekipa ne’ebé atu utiliza tablet ba pagamentu nian. maibé kona-ba diseminasaun informasaun liga ho subsídiu ba públiku MSSI halo hotu ona no hein ekipa instala sistema ba tablet ne’e,” Coimbra dehan.
Tuir nia, kada suku ema na’in-lima (5) mak sei halo pagamentu kompostu hosi funsionáriu ida, xefe suku, xefe aldeia, Pesoal Apoiu Suku (PAS) no OPS.
Kona-ba transporte, daudaun ne’e iha hela faze identifikasaun ba viatura Estadu sira no tuir totál ne’ebé tékniku presiza mak karreta hamutuk 250 hodi fó apoiu ba programa refere, hodi halo pagamentu ba benefisiáriu subsídiu $200 uma kain ne’e kuaze 340.000-resin ona.
“Inisiu ita aprezenta númeru estimativa mak 39.110 maibé depois husu Ministériu Administrasaun Estatál atu aprezenta dadus provizóriu sa’e tan, bainhira mosu aletrasaun ba dekretu-lei ne’e,” nia hateten.
Notísia Relevante: Prezidente Repúblika husu Governu altera lei ba subsídiu $200
Jornalista : Osoria Marques
Editór : Cancio Ximenes
