DILI, 09 novembru 2022 (TATOLI)—Governu liuhosi reuniaun Konsellu Ministru (KM) ordináriu, kuarta ne’e, aprova projetu proposta rezolusaun Parlamentu Nasionál, ne’ebé aprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno.
Inisiativa ne’e hodi estabelese akordu kooperasaun ho Austrália iha área defeza no seguransa hodi hametin liután kooperasaun iha área marrítima.
“Aprovasaun akordu entre parte rua kona-ba kooperasaun iha área defeza no ba estatutu forsa vizitante sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: PR Horta halo vizita Estadu bá Portugál hodi hametin kooperasaun bilaterál
Akordu ne’e sei permite atu hametin kooperasaun entre país rua iha área defeza no seguransa, liuliu iha área marrítima hodi fó hanoin kona-ba fronteira no zona marrítima ne’ebé besik malu.
“Sei permite mós atu reforsa operasaun konjunta, ezersísiu no formasaun, nune’e mós asaun asisténsia umanitária no apoiu katástrofe sira,” nia akresenta.
Tuir akordu ne’e, militár timor-oan iha operasaun no asaun hosi formasaun iha Austrália sei bele hetan protesaun, responsabilidade no priviléjiu hanesan ho militár australianu sira ne’ebé hetan iha Timor-Leste.
Jornalista : Antónia Gusmão
Editora : Julia Chatarina
