OPMT sai manán-na’in ba prémiu liberdade espresaun Max Stahl
DILI, 09 novembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, deside Organizasaun Populárr da Mulher de Timor (OPMT) sai manán-na’in ba prémiu liberdade espresaun Max Stahl iha tinan 2022.
Notísia Relevante: PN aprova regulamentu atribuisaun prémiu Liberdade Espresaun Max Stahl
Tuir komunikadu imprensa ne’ebé Agéncia TATOLI asesu, kuarta ne’e, haktuir atribuisaun prémiu liberdade espresaun Max Stahl institui hosi Parlamentu Nasionál liuhosi rezolusaun Parlamentu Nasional Númeru 25/2021, 19 dezembru.
Prémiu ida-ne’e institui nu’udar omenajen ba personajen ne’ebé halo filme iha tinan 1991 relasiona ho atake ne’ebé halo hosi militár Indonézia kontra timoroan sira-ne’ebé mak dirije manifestasaun pasífika iha semitériu Santa Cruz, Dili.
Prémiu ida-ne’e mós destina ho objetivu atu rekuiñese atividade sidadaun nasionál ka estranjeiru, ka organizasaun naun governamentál. Entidade sira seluk tantu nu’udar serbisu individu ka koletivu, dezignadamente iha área jornalistika, literáriu, siéntifiku ka audiovizuál iha Timor-Leste, hodi halo promosaun, divulgasaun no rekuiñesiimentu ba direitu umanu no defeza ba liberdade espresaun, prezervasaun memória luta no rekuiñesimentu kona-ba istória Timor-Leste.
Ho baze ba artigu 9.º rezolusaun Parlamentu Nasionál nian ida-ne’e, atu implementa atribuisaun prémiu ida-ne’e ho Parlamentu Nasionál aprova tan rezolusaun Númeru 38/2022, 19 setembru, ne’ebé aprova kona-ba regulamentu atribuisaun prémiu liberdade espresaun Max Sthal.
Jurí selesaun no nomesaun ne’e konstitui ho baze ba artigu 7.° ho kompozisaun hamutuk ema na’in-lima (5) hanesan Pe. Julio Crispim, Lucia Lobato, Maria Domingas Fernandes Alves, Constancio Pinto ho Joaquim da Fonseca.
Hosi prosesu tomak iha avaliasaun ba kandidatura iha prémiu ne’e, juri sira simu aplikasaun hosi kandidatu na’in-neen (6), individu na’in-tolu no organizasaun ka instituisaun tolu.
Hafoin juri halo avaliasaun no propoin kandidatu tolu Prezidente Parlamentu Nasionál (PPN) hodi tetu no diside.
Nune’e, ho baze ba proposta husi juri sira PPN konvoka reuniaun lidér bankada iha loron 08 novembru 2022 hodi konsulta ho reprezentante líder bankada parlamentár sira.
Iha reuniaun ne’e, maiória reprezentante lidér bankada sira fó apresiasaun no sujere ba PPN atu konsidera atribuisaun prémiu ida-ne’e ba Organizasaun Populár da Mulher de Timor (OPMT).
Tetu ba apresiasaun no sujestaun hosi lidér bankada sira hotu ho kompeténsia ne’ebe konsta iha artigu 9.º hosi rezolusaun Númeru 38/2022, 19 setembru, ne’e rasik PPN deside OPMT mak nu’udar manán na’in ba prémiu liberdade espresaun Max Stahl iha tinan 2022.
Jornalista : Nelson de Sousa
Editór : Cancio Ximenes
