Programa eskola iha uma rejista tan estudante 521

DILI, 09 novembru 2022 (TATOLI)–Ministériu Edukasaun Juventude no Desportu (MEJD) liuhosi Diresaun Nasionál Edukasaun Pre-eskolár (DNEPE) rejista tan estudante hamutuk 521 atu partisipa programa eskola iha uma.
Diretór Nasionál Edukasaun Pre-eskolár, Tomas do Rosário, hateten, diresaun rekolla estudante sira hosi aldeia 81 iha suku neen.
“Hosi aldeia 81 ne’ebé ita kobre, konsege instala ona sentru ensinu aprendizajen eskola iha uma hamutuk 22 ba estudante 521. Estudante sira ne’e sei tuir programa eskola, kada loron iha oras tolu nia laran,” Diretór informa iha ninia knaar fatin, MEJD Vila Verde, kuarta ne’e.
Matéria ne’ebé sei implementa iha programa ne’e hosi kurríkulu ne’ebé implementa ona iha edukasaun pre-eskolár formál, maski konsidera hanesan planu pilotu tanba foin implementa dahuluk iha munisípiu Dili.
“Modelu eskola iha uma bele atrai labarik sira atu badinas apreende liután tanba ita sei uza modelu avansadu, ne’ebé kada sentru sira sei kompleta ho televizaun no speker inklui livru manuál hanesan kadernu ba manorin inklui estudante sira,” nia tenik.
Notísia relevante: MEJD estabelese ona sentru 21 ba programa eskola iha uma
Tuir Diretór, bainhira aula hahú, labarik sira sei akompaña matéria sira liuhosi televizaun atu bele adapta-an no aproveita saida maka sira rona no haree.
“Ministériu Edukasaun Juventude no Desportu realiza programa ne’e atu tulun labarik sira ne’ebé labele asesu ba edukasaun formál atubele iha direitu asesu edukasaun,” nia salienta.
Diretór ne’e dehan, prosesu rekolla dadus hodi labarik sira partisipa iha programa ne’e konsidera tarde tanba presiza kontribuisaun suku no aldeia atu pasa informasaun ba komunidade hodi bele partisipa iha prosesu foti dadus.
“Dala barak ekipa to’o ona terrenu, maibé abitante ida laiha fatin. Tanba ne’e maka difikulta ekipa ministériu atu foti lalais dadus, maibé programa eskola iha uma depende ba preparasaun iha sentru sira, bainhira prosesu rejistu iha sentru ida konklui ona maka bele hahú ona ensinu aprendizajen ba labarik sira,” nia haktuir.
Jornalista : Tomé Amado
Editora : Julia Chatarina

