iklan

DILI, POLÍTIKA

Reprezentante povu husu Governu dezenvolve setór peska iha Timor-Leste

Reprezentante povu husu Governu dezenvolve setór peska iha Timor-Leste

Membru Governu ho Parlamentu Nasional, hala'o diskusaun jeneralidade Proposta OJE tinan 2023, iha sala plenáriu PN, kuarta (09/11). Imajen TATOLI/Francisco Sony

DILI, 09 novembru 2022 (TATOLI)—Reprezentante Povu iha Parlamentu Nasionál liuhosi deputadu bankada Fretilin, Marito Mota, husu Governu atu dezenvolve setór peska iha Timor-Leste.

Notísia Relevante: OJE 2023 prenxe rekezitu legál no rejimentál

Nia hateten, proposta orsamentu tinan fiskál ba 2023 oitavu Governu prevee millaun $600 hodi finansia  medida sai hosi lei grande opsaun 275 ne’ebé organiza ona hodi haree estratéjia 16 ne’ebé sub-setór hosi planu estratéjiku nasionál.

“Hosi medida 16 hakarak sita de’it medida agrikultura, peska no Floresta hodi kontribui ideia ba Governu. Hosi setór peska, ita-nia tasi luan tebes, ikan barak tinan-tinan ita rona relatóriu katak ita lakon osan barak hosi ita-nia tasi, hanoin tempu ona atu haree dezenvolve,” Deputadu Fretilin ne’e hato’o iha ámbitu debate proposta-lei Orsamentu Jerál Estadu (OJE) 2023 iha faze jeneralidade ba loron datoluk iha Parlamentu Nasionál, kuarta ne’e.

Durante ne’e, Timor-Leste kapasita tiha joven haruka ba iha Korea hanesan serbisu iha área peska nian, nune’e presiza haree ona atu fo formasaun ba joven sira oinsa kaer ikan iha tasi.

“Hanoin tempu ona haree ita-nia joven sira tuir formasaun hodi ba ka’er ikan iha ema-nia rain,  ida-ne’e hanoin agrikultura ita-nia peska presiza haree ona. Nune’e husu Primeiru-Ministru iha tinan 2023 tenke hahú ona neneik hodi transforma ita-nia setór agrikultura peska hosi subsiténsia ba komersiál no indústria,” nia dehan.

Atu moderniza agrikultura no peska, nune’e sustentável garante sidadaun hotu asesu ba aihan saudavel, asesivel kontribui ba kriasaun empregu tanba mina-rai la’ós sustentável loron ida sei maran.

Tinan 20 ona maiória populasaun ne’e kontinua prátika agrikultura subsiténsia no nafatin moris iha liña pobreza enfrenta inseguransa aihan no má-nutrisaun.

Deputadu PUDD, António de Sa Benevides, lori bankada apresia esforsu tomak ne’ebé VIII Governu Konstitusionál hodi bele aprezenta proposta OJE 2023 tuir tempu bazea ba lei enkuadramentu orsamentál no jestaun finanseira.

Lema hosi proposta OJE 2023 investimentu produtivu no kresimentu inkluzivu ba jerasaun futuru.

Nia liga, kona-ba formasaun saida mak TL halo nune’e presiza konsidera didi’ak orsamentu formasaun ba joven sira tanba liga ba tema orsamentu ko’alia jerasaun futuru no haree mós maluk sira-ne’ebé daudaun ne’e serbisu iha rai-li’ur presiza formasaun.

“Primeiru-Ministru ami mós haree orsamentu ba SEFOPE nian fundu dezenvolvimentu kapitál umanu rihun $50 ba sentru formasaun sira. Maibé sentru formasaun akreditadu 90 ho orsamentu rihun $50 de’it ne’e fó formasaun ba joven oinsá’,” nia dehan.

Aleinde nia mós destaka kona-ba proposta OJE ko’alia klasifikasaun no diversifikasaun ekonómiku.

Tuir nia analiza haree ba iha de’it instituisaun hitu mak aloka kona-ba investimentu diversifikasaun ekonómika hanesan MTKI aloka kuaze millaun $5, AIFAESA rihun $622, Sentru Lojístika Nasionál millaun $7, fundu infraestrutura millaun $1, IADE rihun $903 no SERVE millaun $2.

“Ha’u lahetan kona-ba agrikultura nian serake agrikultura pretende duni atu tau orsamentu duni atu halo investimentu diversifikasaun ekonomiku ida-ne’ebé ita tau ba ne’e kuaze instituisaun maibé real atu implementa transforma diversifika ita-nia ekonomia, ita la hetan osan se ita totál hamutuk orsamentu millaun $25 mak ita aloka,” nia dehan.

Deputadu PD, António da Conceição ‘Kalohan’, fó apresiasaun iha jeneralidade ba proposta OJE ba tinan oin daudaun ne’e Governu aprezenta kumpre mandatu konstituisionál no responsabilidade ukun nian.

Deputada PLP, Domingas dos Santos, mós apresia VIII Governu Konstitusionál tanba hasoru dezáfiu oioin hanesan impase polítika, COVID-19, kalamidade públika konsege hakat sai no daudaun ne’e aprezenta proposta OJE ba 2023.

 Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!