iklan

HEADLINE, MUNISÍPIU, VIQUEQUE

Sentru Juventude Viqueque realiza atividade haat komemora loron istóriku

Sentru Juventude Viqueque realiza atividade haat komemora loron istóriku

Prezidente komisaun organizadora, Jesuinho Luís. Imajen Tatoli/Vitorino Lopes da Costa

VIQUEQUE, 09 novembru 2022 (TATOLI)—Sentru Juventude munisípiu Viqueque sei realiza atividade haat, hahú loron 09 to’ 12 novembru, hodi komemora loron nasionál Juventude Loriku Asu’ain ba dala-31 no Masakre Santa loron 12 novembru 1991.

Prezidente komisaun organizadora, Jesuinho Luís, hateten, komemorasaun loron nasionál ne’e hodi juventude iha Timor-Leste tomak bele presta omenajen ba joven no Saudozu Max Stahl nia dedikasaun tomak ba prosesu luta libertasaun pátria ba povu Maubere, nune’e jerasaun foun agora bele memoriza no valoriza loron istóriku.

“Atividade haat ne’ebé sei realiza maka limpeza jerál, semináriu, jogu amizade ba joventude iha munisípiu Viqueque no  kalan reflesaun hodi hanoin filafali joven sira ne’ebé uluk luta ba libertasaun nasionál no Saudozu Max Stahl ninia kontribuisaun,” Jesuinho Luís, relata iha suku Caraubalu, Beloi, kuarta ne’e.

Komemorasaun loron nasionál Juventude Loriku Asu’ain ba tinan ne’e ho tema ‘kaer metin valór juventude rezisténsia, hamutuk ita konstrui nasaun ho esperiénsia ba futuru.’

Objetivu prinsipál hosi selebrasaun ne’e mak atu kria espasu ba joven sira hodi espresa hanoin no sensibiliza istória luta loriku asu’wain iha pasadu ba jerasaun foun sira hodi banati tuir no asegura espíritu nasionál no patriotizmu iha prosesu konstrusaun Estadu Timor-Leste.

Notísia relevante: Konstrusaun Monumentu 12 Novembru tarde, komemorasaun la’o nafatin

Estudante sekundáriu munisípiu Viqueque hahú atividade limpeza jerál ohin iha estrada públikua hodi hamos lixu.

“Iha sábadu loron 12 novembru, ami sei realiza misa hafoin kontinua kari ai-funan no sunu lilin iha semitériu Santa Cruz Viqueque Vila. Hafoin kari aifunan hotu, kalan konsertu iha kampu demokrasia,” nia akresenta.

Sentru Juventude munisípiu Viqueuqeu hetan apoia fundu hosi Sekretáriu Estadu Juventude no Desportu (SEJD) totál hamutuk $3.500 hodi realiza atividade iha ámbitu komemorasaun loron 12 novembru.

“Ami aloka orsamentu ba postu administrativu lima hodi komememora loron istóriku ne’e. Kada tinan ami sempre realiza hodi komemora loron importante sira nune’e foin sa’e sira bele hanoin hikas partisipasaun juventude ba  luta libertasaun,” nia dehan.

Nune’e, nia husu juventude sira iha munisípiu Viqueque hodi hatudu talentu iha ámbitu komemorasaun 12 novembru 1991, nune’e bele redús konflitu ne’ebé akontese iha munisípiu Viqueque.

“Prinsipiu Sentru Juventude Viqueque maka akumula joven sira hodi hatudu talentu hodi kria páz no estabilidade,” nia salienta.

Jornalista   : Vitorino Lopes da Costa

Editora        :  Julia Chatarina

iklan
iklan

Leave a Reply

iklan
error: Content is protected !!