iklan

HEADLINE, SAÚDE

SSM Manufahi prepara atu prevene surtu dengue

SSM Manufahi prepara atu prevene surtu dengue

Mapa Munisípiu Viqueque /Manufahi ;Imagem/Infografia: Octavio de J.Guterres

DILI, 09 novembru 2022 (TATOLI)—Diretora Servisu Saúde Manufahi, Florencia Corteral Tilman, informa daudaun profisionál saúde sira iha munisípiu Manufahi preparadu atu halo prevensaun no kombate surtu dengue.

“Ami preparadu hela atu prevene no kombate surtu dengue, bainhira kazu mosu iha munisípiu ne’e. Ami nia fasilidade saúde sira seidauk rejistu kazu dengue, maske daudaun tempu udan hela”, hateten Diretora ne’e ba TATOLI via telefónika, kuarta ne’e.

Durante fulan outubru ekipa saúde hahú tama sai uma hodi hala’o promosaun ka sosializasaun ba família sira  atu hamoos sira nia bairru ka uma ninin,  roda aat sira tenke hakoi, troka bee iha bazu ai-funan sira, atu hadook aan hosi surtu dengue.

Tuir nia, ekipamentu ka medikamentu ba fumigasaun preparadu atu halo intervesaun bainhira detata kazu foun dengue iha komunidade nia leet.

“Ai-moruk abate no fumigasaun iha ne’e sufiente atu halo intervesaun ba kazu dengue no ami mós tau ona ai-moruk abate ba iha komunidade  sira nia bee  atu susuk nia tolun bele mate hotu, hafoin halo fumigasaun,” katak.

Menus Profisionál Saúde

Entretantu, Diretora ne’e informa profisionál saúde iha Manufahi menus hodi halo atendimentu ba pasiente sira.

“Ami nia rekursu umanu menus liuliu ba parteira, médiku no enfermeiru, nune’e ami presiza sira ne’e hodi apoia fasilidade saúde sira Manufahi atu halo atendimentu ba pasiente sira”.

Kona-ba rekursu umanu menu, nia dehan halo ona proposta ba nasionál atu apoia tan profisionál saúde, maibé to’o agora seidauk iha solusaun.

“Desde uluk kedas, ami hato’o proposta ba nasionál, maibé rekrutamentu mak laiha ne’ebé fdifikulta ami halo atendimentu ba pasiente sira”, nia afirma.

Daudaun pesoál saúde iha munisípiu Manufahi hanesan médiku na’in-30, Enfermeiru 29 no parteira 30 ne’ebé durante ne’e kobre  ba iha sentru saúde  haat iha Manufahi no postu saúde 23,  kompostu husi sentru internamentu ida no  maternidade haat.

Notísia relevante :Timor-Leste rejista kazu dengue foun hitu

Jornalista : Felicidade Ximenes

Editór          : Florencio Miranda Ximenes

iklan
iklan

Leave a Reply

iklan
error: Content is protected !!