DILI, 08 novembru 2022 (TATOLI)—Diretór Nasionál Saúde Publika iha Ministériu Saúde Frederico Bosco, informa hahú hosi outubru to’o meadu novembru ne’e, rejista kazu dengue 58, hosi númeru ne’e kazu dengue foun hitu.
“Iha fulan outubru ita rejista kazu dengue hamutuk 51, no iha meadu novembru kazu dengue foun hitu. Kazu hirak ne’e rejista iha fasilidade saúde Dili, Ermera no Manufahi no afeta maioria ba labarik idade 14 mai kraik,” Diretór Nasionál ne’e hateten ba Agência TATOLI, tersa ne’e.
Tuir nian, pasiente dengue na’in-haat mak kontinua halo tratamentu intesivu iha Hospitál Nasionál Guido Valadares (HNGV) no seluk rekuperadu hotu ona tanba kazu kamaan.
Resposavél ne’e afirma ekipa saúde halo ona fumigasaun ba pasiente sira nia uma hodi prevene transmisaun surtu dengue
Nune’e, Diretór husu ba populasaun atu komesa ona asaun limpeja jerál iha kada bairru hodi halo kombate dengue iha nasaun ne’e.
“Husu ba família tomak atu proteje-an liu husi prátika medida preventiva hanesan halo limpeja jerál liuliu fase tanke, bidon, no troka bee kada semana ida dala ida, uza replente liuliu kose ba labarik kiik sira no inan isin rua sira,”nia sujere.
Tuir dadus hahú hosi janeiru rejista ona infetadu dengue na’in-5.480 no óbitu hamutuk 57.
Jornalista : Felicidade Ximenes
Editór : Florencio Miranda Ximenes
