Autoridade Baucau realiza formasaun ba kargu xefia
BAUCAU, 10 novembru 2022 (TATOLI) – Autoridade Administrasaun Munisipál Baucau, kinta ne’e, realiza formasaun no forum diskusaun grupu ba partisipante hamutuk na’in-32 bazea dekretu-lei númeru 3/2016, loron 16 kona-ba kompeténsia no dominu serbisu ba diretór serbisu munisipál.
Formasaun refere realiza bainhira Prezidente Autoridade Munisipál (PAM) Baucau, Olivio ‘Bou-Lesa’ Freitas hato’o pedidu ba parseiru ida naran PARTISIPA hodi fó formasaun kona-ba kompeténsia diresaun hotu tuir dekretu-lei númeru 3/2016.
“Kuandu laiha formasaun, dalabarak halo sala la tuir kompeténsia entaun ikus-mai akontese fó sala ba PAM ka diretór bainhira la halo tuir kompeténsia ne’ebé atribui tuir lei,” Prezidente Autoridade Munisipál (PAM) Baucau hateten iha salaun apuramentu, Vila Nova, kinta ne’e.
Formasaun ne’e realiza durante loron-rua ne’ebé sei remata iha loron sesta, 11 novembru liuhosi formadór asesór seniór jestaun finansa públika PARTISIPA, Rui Maria de Araújo ne’ebé partisipa hosi diretór serbisu munisipál, xefe departamentu, administradór postu administrativu neen, asesór no xefe gabinete na’in-32.
Bou-Lesa argumenta, kargu xefia hotu presiza iha koñesementu tuir kompeténsia ne’ebé lei atribui tanba tenke hala’o kna’ar ho loloos nune’e bele fó impaktu ba prosesu serbisu iha administrasaun tuir orientasaun hosi Prezidente Autoridade bazea ba dekretu lei númeru 3/2016 no diploma ministeriál númeru 48/2016.
“La’ós xefe gabinete sai fali diretór sira-nia lideransa no diretór sira manda fali xefe gabinte, ne’e lae,” Bou-Lesa akresenta.
Notísia relevante: OJE 2022: Baucau ezekuta ona 77.5%
Jornalista : Natalino Belo
Editór : Evaristo Soares Martins
