iklan

EDUKASAUN, HEADLINE

Estudante pre-inskrisaun balun hasoru ona Vise-Reitór UNTL hodi hahú prosesu admisaun

Estudante pre-inskrisaun balun hasoru ona Vise-Reitór UNTL hodi hahú prosesu admisaun

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

ILI, 10 novembru 2022 (TATOLI)—Estudante ne’ebé tama iha rejime pre-inskrisaun diretamente hasoru ona Vise-Reitór ne’ebé trata asuntu akadémiku no garantia kualidade Universidade Nasionál Timor-Lorosa’e (UNTL), Samuel Venâncio de Sousa Freitas, atu hahú filafali prosesu re-admisaun.

“Iha ona estudante rejime pre-inskrisaun ka estudante dropout (DO) lubuk ida mak mai ona hasoru ha’u. Ha’u tau sira-nia lista iha ne’ebá no ha’u seidauk haree hotu lista sira, maibé bele dehan iha estudante 20 to’o 30,” Vise-Reitór informa iha Gabinete UNTL, kinta ne’e.

Maski nia parte alista ona estudante rejime pre-inskrisaun iha ninia gabinete, maibé prosesu inskrisaun atu simu estudante seidauk hatene tanba presiza hein kalendáriu universidade.

“Tuir prosedimentu ne’ebé la’o, baibain sempre realiza iha tinan foun. Ho nune’e posibilidade inskrisaun sei hahú iha janeiru 2023 no sei loke ba alunu tuan no foun dala de’it, maibé prosesu atendimentu maka sei fahe,” nia akresenta.

UNTL rasik rejista dadus jerál estudante hamutuk 40.000 resin, ne’ebé hosi númeru ne’e, parte universidade identifika estudante 17.509 naran iha maibé la ativu ona.

“Prosesu inskrisaun iha tinan 2023 mak sei haree estudante dropout hira maka sei filafali mai kontinua eskola. UNTL iha ona regulamentu rejime pre-inskrisaun, maibé durante ezisténsia, regulamentu akadémiku nunka implementa ho di’ak, tanba ne’e liuhosi kompromisu Reitoria, UNTL toma pozisaun hodi regulariza prosesu inskrisaun estudante sira ne’ebé tama ona kategoria DO. Ezemplu ba sira ne’ebé agora laiha ka ba buka ona serbisu iha fatin seluk, hafoin hakarak mai eskola ita loke filafali oportunidade atu halo re-admisaun,” nia tenik.

Notísia relevante: UNTL fó tempu fulan-18 ba estudante inativu 17.509 halo inskrisaun

Ho nune’e, kualkér forma bele hatama maibé universidade sei prosesa ba rejime pre-inskrisaun ne’ebé sei realiza iha tinan oin. Signifika dokumentu ne’ebé estudante sira hatama ninia prazu sei to’o tinan 2024, ne’ebé hahú hosi tinan 2022 sei iha tinan-ida fulan-neen ba estudante sira.

“Durante prazu ne’e ita sei simu dokumentu. Ba sira ne’ebé hakarak fila kontinua eskola tenke submete dadus kompletu hosi fakuldade inisiál no kursu saida maka durante ne’e nia foti depois nia para iha semester hira. Bainhira fakuldade fó ona paresér katak loos duni ema ne’e estudante hosi fakuldade refere ne’ebé agora hakarak tama ba fakuldade ida-ne’e,” nia dehan.

Bainhira iha ona paresér hosi fakuldade maka simplezmente Gabinete Vise-Reitór ne’ebé trata asuntu estudante no garante kualidade sei halo despaixu ida hodi dirije ba Diretór Jerál Akadémiku atu simu hela inskrisaun estudante hodi koloka fali ba fakuldade seluk.

“Maibé estudante ne’e tenke kontinua nafatin ninia obrigasaun hanesan estudante tanba tempu ba kotuk nia la kompleta prosesu administrasaun, entaun nia tenke selu filafali semestre ne’ebé nia husik hela mak foin bele kontinua prosesu ensinu aprendizajen iha UNTL,” Vise-Reitór esplika.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!