iklan

EDUKASAUN, HEADLINE

Instalasaun liña internet kuaze kobre eskola iha territóriu nasionál

Instalasaun liña internet kuaze kobre eskola iha territóriu nasionál

Ilustrasaun Servisu interkoneksaun. Imajen/Espesiál

DILI, 10 novembru 2022 (TATOLI)—Ministériu Edukasaun Juventude no Desportu (MEJD) implementa ona liña internet ba eskola ensinu báziku sentrál, ensinu sekundáriu jerál no tékniku vokasionál ho persentajen 80% iha territóriu nasionál, liuhosi kooperasaun ho operadór telekomunikasaun Telemor no Telkomcel.

Tuir Diretór Jerál Administrasaun no Jestaun Finansa, Antoninho Pires, planu no programa pilotu ba instalasaun liña internet ne’e loloos hahú uluk hosi munisípiu Dili, Bobonaro no Baucau, maibé MEJD haree orsamentu alokadu ho montante $900.000 ne’e naton atu abranje tan ba eskola sira seluk.

“Ami halo tiha montajen ba eskola sira iha munisípiu tolu ne’e, haree ba osan instalasaun ne’e sei iha hela, entaun ami deside di’ak liu instala hotu liña internet ne’e ba eskola sira iha territóriu nasionál,” Diretór informa iha salaun MEJD, Vila Verde, kinta ne’e.

Notísia relevante: Instalasaun liña internet ba eskola atinje ona 40%

Maski nune’e, tuir Dirijente ne’e, instalasaun liña internet ba de’it eskola sira ne’ebé bele asesu ba eletrisidade no bele hela liña di’ak.

“Iha eskola balun to’o agora seidauk hetan konesaun liña internet tanba estasaun dook hosi área eskola. Instalasaun ne’e fó liu prioridade ba eskola ensinu báziku sentrál, eskola ensinu sekundáriu jerál no tékniku vokasionál sira ne’ebé iha vila no bele asesu ona ba estasaun liña internet no eletrisidade,” nia akresenta.

Eskola 80% iha territóriu nasionál ne’ebé asesu ona liña internet, entre eskola ensinu báziku sentrál 400 resin ne’ebé eziste, iha eskola 360 hetan ona instalasaun internet (60%), enkuantu ensinu sekundáriu jerál no tékniku vokasionál kobre hotu kedan tanba eskola sira ne’e lokaliza iha vila.

Diretór dehan, ba eskla sira ne’ebé seidauk asesu ba eeltrisidade, parte ministériu halo hela esforsu hodi koordena ho Ministériu Transporte no Komunikasaun tanba sira iha programa instalasaun liña eletrisidade

“Fiar katak to’o tinan ne’e ramata, eskola sira ne’ebé la asesu ba eletrisidade bele hetan hotu ona, atu nune’e Ministériu Edukasaun bele mós instalasaun internet ba eskola sira hotu hodi fó biban ba estudante no profesór sira,” nia salienta.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!