iklan

DILI, POLÍTIKA

Rezultadu peskiza MAPKOMS hatudu sidadaun TL 65,48% asesu televizaun

Rezultadu peskiza MAPKOMS hatudu sidadaun TL 65,48% asesu televizaun

Ekipa monitorizasaun hosi MAPKOMS ne’ebe halo peskiza ba mídia eletrónika online no emprime bainhira halo sira-nia apresentasaun iha semináriu nasionál ne’ebé organiza hosi MAPKOMS iha salaun Delta Nova, kinta (10 novembru 2022. Imajen Tatoli/António Daciparu

DILI, 10 novembru 2022 (TATOLI)—Ministériu Asuntu Parlamentar no Komunikasaun Sosiál (MAPKOMS) fó sai rezultadu kona-ba sidadaun asesu ba meiu komunikasaun sosial ihá Timor-Leste.

Xefe Departamentu Peskiza no Ánaliza Mídia iha MAPKOMS, Lidia Asunssão das Neves hateten, bazea ba peskiza ne’ebé MAPKOMS halo ne’e hatudu meiu komunikasaun sosiál ne’ebé sidadaun Timor-Leste sira asesu másimu ona mak kanal televizaun ho 65.48% no tuir mak liña internet.

“Ita tama ba iha asesu televizaun nian iha ne’e hosi totál amostra 2.393 ne’ebé ita foti nia persentazen ne’ebé asesu komesa aumenta kompara ho meiu rua seluk. Iha ne’e hosi 2.393 iha 1.567 ka sejá 65.48% mak asesu ba televizaun ka gosta asesu televizaun. Enkuantu 826 ka 34.52% laiha asesu ka laharee televizaun. Tuir-mai ita tama ba iha asesu liña internet no ida ne’ebé asesu komesa aas uitoan. Iha nee sira-ne’ebé asesu iha 46.30% no ne’ebé la asesu iha 53.70%,” Xefe Departamentu Peskiza no Ánaliza Mídia ne’e hateten iha semináriu nasionál “Sidadaun nia asesu ba meiu komunikasaun sosiál“ iha salaun Delta Nova, Dili, kinta ne’e.

Enkuantu diferensa fali ho meiu komunikasaun sosiál rua uluk, sidadaun sira-nia asesu ba meiu komunikasaun rádiu no jornál ne’e mínimu tebes.

“Asesu ba jornál hosi 2.393 amostra ne’ebé ita rekolla iha ne’e iha 199 ka 8.32% mak asesu ba jornál enkuantu ne’ebé la asesu iha ne’e 2.194 ka 91.68%,” nia dehan.

Didadaun ne’ebé asesu ba rádiu nian ho totál amostra ne’ebé rekolla iha pursentu ne’ebé asesu aumenta uitoan kompara ho jornál, tanba iha iha 638 ka 26.66% mak rona rádiu, enkuantu ne’ebé la asesu kontinua aas nafatin ho totál hamutuk 1.755 ho 73.34% mak la rona,

Métodu ne’ebé sira uza hodi rekolla dadús mak entrevista no distribuisaun kestionáriu ba iha respondente sira no iha peskiza ida-ne’e sidadaun timoroan hotu ho idade hahú hosi tinan 15 ba leten.

Amosrta ka totál populasaun ne’ebé sira rekolla durante peskiza hamutuk 2.393 ho métodu ne’ebé uza mak métodu amostrazen aleatória.

Hosi 2.393 amostrazen ne’ebé rekolla, haree ba sexu feto nian hamutuk 1.394 nune’e iha 58% no mane iha 999 ka 42%.

Atividade ida-ne’e hala’o bazea ba planu asaun anuál tinan 2021 no 2022 nian ne’ebé hatuur iha programa garantia liberdade espresaun no asesu ba informasaun ho nia sub-programa diseminasaun informasaun kona-ba asaun governativa no ba programa dezenvolvimentu.

Atividade ida hanaran peskiza index públiku asesu ba meiu komunikasaun sosiál no atividade ne’e hala’o durante tinan ida (1) nia-laran.

Relasiona ho aprezentasaun ne’ebé mak parte peskizadór fó sai, Ministru Asusntu Parlamentár no Komunikasaun Sosiál (MAPKOMS), Francisco Jerónimo, hateten peskiza ida-ne’e la haree ba kauza maibé haree ba asesu ba informasaun mídia iha Timor-Leste.

“Ita seidauk haree kona-ba tanbasá, iha ka kona-ba kestaun ruma, ida-ne’e ita seidauk haree to’o iha ne’ebá. Apenas fó de’it informasaun kona-ba asesu ne’ebé mak ita-nia komunidade iha Timor-Leste, hahú iha kapitál, munisípiu, suku no aldeia nia asesu ba informasaun,” nia dehan.

Ida-ne’e de’it seidauk haree kauza, seidauk haree razaun saida, tanbasá no halo oinsá mak Governu foti medida tanba ida-ne’e TL seidauk to’o iha ne’ebá.

“Ho informasaun sira-ne’e ajuda ita Governu atu haree fila-fali futuru saida mak ita atu halo ba situasaun sira-ne’e liu-liu asesu ba informasaun sira-ne’e, tuir duni polítika Governu nian,” nia dehan.

Notísia Relevante: Aban, MAPKOMS aprezenta indeks públiku asesu ba meiu komunikasaun

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!