VIQUEQUE, 10 novembru 2022 (TATOLI)—Servisu Agrikultura Viqueque seidauk konsege apoiu tratór boot ba komunidade lokál hodi hala’o atividade tanba laiha óleu filtru.
“Ami labele apoiu tratór boot ba komunidade hodi hala’o atividade fila rai iha époka ne’e tanba laiha óleu filtru,” Xefe Departamentu Programa Estensaun Agrikultura munisípiu Viqueque, Agostinho Pinto Mascarenhas, informa ba Agência Tatoli, iha edifísiu Servisu Agrikultura Viqueque, Beloi, kinta ne’e.
Ministériu Agrikultura no Peska (MAP) foin lalais loke ona konkursu ba óleu filtru no empreza manán-na’in sosa ona iha Surabaya, Indonézia, maibé to’o agora seidauk lori ba Viqueque.
“Ita hein de’it bainhira maka empreza lori mai hodi halo manutensaun ba tratór boot sira-ne’e,” nia akresenta.
Notísia relevante: Tratór boot iha Viqueque ho kondisaun di’ak iha 12
Tinan ne’e komunidade agrikultór sira hosi postu administrativu Uatulari, Viqueque Vila no Ossu hatama ona pedidu atu fila rai ektare 450, maibé MAP Viqueqeu labele responde tanba óleu filtru laiha.
“Foin lalais ami simu pedidu hosi komunidade agrikultura, maibé ami labele responde tanba difikuldade ne’ebé ami hasoru maka óleu filtru. Pedidu ne’e ami nafatin tau ba konsiderasaun ba tinan oin (2023). Nune’e tinan oin ha’u hanoin sei bele responde komunidade nia pedidu,” nia tenik.
MAP Viqueque iha tratór boot unidade 39, tratór boot lima ho kondisaun di’ak, 17 a’at naton no 17 seluk a’at totál.
Jornalista : Vitorino Lopes da Costa
Editora : Julia Chatarina
