iklan

NASIONÁL, HEADLINE, KAPITÁL

TIC Timor, I.P sei  sosializa identidade únika ba entidade sira iha Ainaro no Aileu

TIC Timor, I.P sei  sosializa identidade únika ba entidade sira iha Ainaro no Aileu

Ekipa ID úniku hasai foto hamutuk ho autoridade sira iha postu administrativu Atsabe, munisípiu Ermera hafoin halo atividade sosializasaun identidade únika. Imajen/Mídia IDU

DILI, 10 novembru 2022 (TATOLI)—Ajénsia Teknolojia Informasaun no Komunikasaun Timor, Institutu Públiku (TIC Timor, I.P) liuhusi Diresaun Identidade Úniku sei sosializa programa ID Úniku ba autoridade sira iha munisípiu Ainaro no Aileu.

“Tuir planu atividade sosializasaun iha novembru sei realiza ba postu administrativu ualu iha munisípiu Ainaro no Aileu, hahú hosi loron 14 to’o 23 novembru 2022. Sosializasaun programa ID Úniku ba administradór postu, xefe suku, xefe aldeia no funsionáriu destakadu sira sei hala’o iha salaun postu administrativu iha munisípiu Ainaro no Aileu,” refere nota ne’ebé Agência Tatoli asesu, kinta ne’e.

Inisiativa ne’e tanba TIC Timor, I.P nu’udar implementadór ba ajenda reforma administrasaun públika, ne’ebé alista implementasaun sistema identifikasaun úniku modernu nu’udar komponente xave ba implementasaun E-Governu, nune’e hahú halo sosializasaun programa ID Úniku ba instituisaun Governu, setór privadu, instituisaun akadémiku no autoridade lokál sira.

Notísia relevante: Índia hakarak apoia Timor-Leste dezenvolve sistema identifikasaun úniku

Ekipa sosializasaun sei halo aprezentasaun iha munisípiu Ainaro, liuliu postu administrativu Ainaro Vila iha loron 14 novembru 2022, Hatu-Udo iha loron 15 novembru 2022, Hatu-Builico iha loron 16 novembru 2022, Maubise iha loron 17 novembru 2022, no kontinua ba munisípiu Aileu, postu administrativu Aileu Vila iha loron 18 novembru 2022, Likidoe iha loron 21 novembru 2022, Remexiu 22 novembru 2022, no remata iha postu administrativu Laulara iha loron 23 novembru 2022.

TIC Timor, I.P sai nu’udar institutu públiku ho ninia natureza jurídika ne’ebé maka iha autonomia administrativu, orsamentu no patrimóniu rasik tuir dekretu-lei númeru 29/2017, ne’ebé tutela ba Primeiru-Ministru no lidera husi Diretór Ezekutivu.

Ajénsia ne’e iha misaun hodi implementa polítika no estratejia ne’ebé maka aprova ona iha matéria kona-ba teknolojia, informasaun no komunikasaun hodi jere rede informátika Governu no entidade públiku sira seluk, inklui halo jestaun ba infraestrutura teknolojia, informasaun no komunikasaun no fó apoiu iha área teknolojia, informasaun no komunikasaun inklui sistema informasaun.

Liuhusi Diresaun ID Úniku hahú implementa programa Identidade Úniku (IDU) ne’ebé sei hala’o rejistrasaun ba sidadaun Timor-Leste no mos rezidente sira hotu ne’ebé hela iha Timor-Leste.

Iha prosesu implementasaun ne’e, parte diresaun sei hala’o sosializasaun ba programa IDU iha territóriu Timor laran tanba sistema ID Úniku permite Governu atu hadi’a atendimentu servisu públiku, jestaun no koordenasaun polítika sosiál sira.

Nune’e, permite Governu no setór privadu atu identifika di’ak liu ninia sidadaun sira, inklui ema sira iha ninia rai-fronteira laran hodi responde ba pergunta sira hanesan ‘Ita mak sé?’, ‘Ita mak ema ne’e duni ka la’e?’.

ID Úniku hanesan identidade dijitál ida ne’ebé sei uza hodi identifika no auténtika ema. Iha ne’e ID úniku ka ID Dijitál sei konsiste hosi númeru ID Úniku (NIU) ho díjitu 10 (kria aleatoriamente), informasaun biográfiku (naran, data moris, no fatin moris) no informasaun biométriku (finger-print/liman fuan, imajen oin/facial image no iris/matan).

Sosializasaun ne’e sei hetan partisipasaun hosi Diretór Ezekutivu  TIC Timor I.P, Roberto Caetano de Sousa Vicente, Ekipa ID Úniku, autoridade munisipál sira, autoridade postu administrativu, xefe suku, xefe aldeia, no ajente estadu inklui mós funsionáriu destakadu hosi ministeriu iha postu administrativu sira iha Ainaro no Aileu.

Antes ne’e, Diresaun Identidade Úniku halo ona sosializasaun ba parseiru dezenvolvimentu, ministériu sira, universitáriu, no entidade relevante sira seluk, inklui sosializasaun ba munisípiu ne’ebé hala’o ona iha postu administrativu sira iha munisípiu Liquiçá, postu sira iha munisípiu Ermera, no Rejiaun Autonomia Espesiál Oé-cusse Ambeno (RAEOA), sosializasaun ba administradór munisípiu no mós prezidente autoridade sira iha reunian konsellu koordenasaun teritoriál, no sei kontinua ba munisípiu sira seluk.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!