TTU-RAEOA diskute futuru kooperasaun iha área veterinária
OÉ-CUSSE, 10 novembru 2022 (TATOLI) –Autoridade distritu Timur Tengah Utara (TTU), Indonéslzia no Autoridade Rejiaun Administrativa Espesiál Oé-Cusse Ambeno (RAEOA), kinta ne’e realiza diskusaun kona-bá futuru kooperasaun iha área veterinária.
Diskusaun ne’e akontese bainhira ekipa delegasaun hosi RAEOA maioria xefe suku no jestór sira, lideradu Adjuntu Prezidente Autoridade ba Asuntu Sosiál, Maximiano Neno, hamutuk ho Diretór Veternária TTU, Trimeldus Tonbesi, hafoin hala’o vizita ofisiál iha sentru produsaun manu tolun iha empreza CV. Sane Faun no mos sentru haki’ak animál nian iha sub-rejiaun Insana Súl.
Iha vizita ne’e, Adjuntu Prezidente Autoridade ba Asuntu Sosiál, Maximiano Neno, informa, prezensa delegasaun hosi RAEOA hamutuk ho Autoridade komunitáriu iha TTU hanesan ativdade kontinuasaun hodi hametin relasaun lasu amizade entre komunidade iha liña fronteira terrestre espesiál TTU no RAEOA.
Nune’e ekipa delegasaun ne’e mai hosi prezensa autoridade komunitáriu sira, atu haree progresu serbisu ba área veternária nian ne’ebé daudaun ne’e komunidade TTU realiza ona, nune’e ba futuru bele promove diskusaun hametin relasaun serbisu hamutuk iha setór agrikultura ba área veterinária nian.
“Ami-nia vizita ofisiál ne’e atu promove diskusaun no observa progresu área veterinária nian, atu nune’e iha futuru bele serbisu hamutuk ba atividade sosiál no ekonómia hanesan importasaun produsaun ba Oé-Cusse, nune’e produsaun hosi Timor-Leste espesiál iha RAEOA bele halo esportasaun mai iha TTU,” Maximiano Neno, ko’alia iha sentru produsaun manu tolun iha CV. Sani Faun sub-rejiaun Insana Selatan.
Nune’e mós bele promove diskusaun atu serbisu hamutuk iha tékniku oinsá bele prodús manu tolun hodi fronese ba rai seluk nune’e mós tékniku ba karau nian oinsá bele haki’ak karau ho tékniku modernu nian.
“Intensaun hosi diskusaun sira ne’e nia objetivu ba futuru, tanba daudaun ne’e Estadu Timor-Leste ho Indonézia selebra ona akordu ba implementasaun free trade zone (zona perdagangan bebas), entaun programa agrikultura no veternária mós sei envolve iha polítika ne’e atu implementa iha liña fronteira, entaun bainhira hahú tama iha faze implementa ita bele hametin liután ita-nia kooperasaun ne’e, tanba TTU ho RAEOA tradisaun kultura hanesan maibé diferente iha fronteira,” nia katak.
Iha fatin hanesan, Diretór Veterinária TTU, Trimeldus Tonbesi, orgullu tanba RAEOA hili TTU atu hodi vizita ho objetivu atu hametin relasaun bilaterál no promove diskusaun ba futuru kooperasaun iha área veterinária nian.
“Ha’’u agradesu ho prezensa bainaka hosi RAEOA, ida-ne’e pasu importante oinsa iha futuru bele hametin liután ita-nia relasaun ne’e, ohin ita mai vizita fatin rua veterinária ba produsaun manu tolun no veterinária haki’ak karau nian, ita espera iha futuru ita bele serbisu hamutuk atu dezenvolve di’ak liután área ida-ne’e tantu tékniku no mós merkadu nian ba importasaun no esportasaun,” nia orgullu.
Notísia relevante: Inovasaun lima iha Insana Indonézia sei haforsa polítika suku Amasat iha RAEOA
Jornalista: Abílio Elo Nini
Editor: Evaristo Soares Martins
