Bolsa da mãe jerasaun foun motiva inan isin-rua hakbesik ba fasilidade saúde
BOBONARO, 11 novembru 2022 (TATOLI) — Diretór Servisu Saúde Munisípiu Bobonaro, João Barreto Cardoso, hateten ho prezensa programa subsídiu Bolsa da Mãe Jerasaun Foun (BMJF) iha pasu positivu tanba motiva inan-isin rua ho labarik sira badinas ba konsulta iha fasilidade saúde ne’ebé estabelese iha suku sira no Hospital Referál Maliana.
Notísia relevante: Benefisiáriu elijivel 7,515 sei simu subsídiu bolsa da mãe jerasaun foun
“Programa ida-ne’e kontribuisaun positivu tanba vizita inan-isin rua sira lori labarik sira mai iha fasilidade saúde, bainbain labarik sira-ne’e la mai tetu, inan sira mai konsulta ante-natál kompara ho molok programa ne’e iha númeru aumenta, ho programa ida ne’e inan sira mai vizita fásilidade saúde badinas loos,” nia informa ba jornalista sira, iha Maliana.
Diretór João subliña, pesoál saúde sira-ne’ebé kolokada iha fasilidade saúde sira kontinua halo promosaun ba programa ne’e nune’e bele hetan partisipasaun másimu.
“Ami sei serbisu hamutuk ho ofisiál MSSI nian ne’ebé kolokadu iha postu idak-idak atu hamutuk ho ita-nia pesoál saúde sira konsulta, depois ofisiál sira-ne’e halo verifikasaun dokumentu nune’e bele rejistu iha sistema,” nia akresenta.
Tuir dadus hosi sentru solidariedade sosiál munisipál Bobonaro, inan isin-rua no labarik hamutuk 632 mak MSSI aprova ona sai benefisiáriu tanba prienxe ona kritéria hanesan, ba konsulta iha klínika no ospitál referál sira-ne’ebé estadu prepara, lori kartaun eleitorál, billete identidade no pasporte, loke konta bankária hosi Banku Nasionál Komérsiu Timor-Leste (BNCTL, sigla portugés).
Bolsa da mãe jerasaun foun
Programa Bolsa da Mãe jerasaun foun ho objetivu prisnsipál mak atu mellora rendimentu familiár, estímula eradikasaun pobreza no hamlaha, mellora saúde no nutrisaun inan isin-rua no labarik.
Nune’e mós promove atividade ekonomia lokál no hasa’e kualidade edukasaun hodi kontribui ba atinjimentu objetivu dezenvolvimentu sustentável.
Enkuantu valór transferénsia maka $15 kada fulan ba inan isin-rua no $20 kada fulan ba oan ida iha 2022, maibé valór ne’e sei revee hodi ajusta kada tinan bazea ba taxa inflasaun.
Governu nia programa asisténsia sosiál ba inan isin-rua no labarik ho tinan 0-3, kontinua to’o tinan 6. Iha suplementu adisionál ba labarik sira ho moras króniku ka defisiénsia.
Programa ne’e ho objetivu atu hamenus pobreza, hadi’ak saúde no nutrisaun, redús ra’es-badak no haburas ekonomia ba hotu-hotu.
Programa ne’e hahú uluk iha munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA) iha tinan 2022 no sei haluan neineik ba territóriu nasionál.
Rejistrasaun subsídiu inan isin-rua
Rejistu ba subsídiu inan isin-rua ne’e kada inan isin-rua bele vizita fasilidade saúde, konsulta ho pesoál saúde no aprezenta dokumentu pesoál.
Dokumentu sira-ne’ebé utiliza ne’e tenke inan-aman sira-nian mak hanesan kartaun eleitorál ka BI ka pasaporte, livriñu saúde inan no oan, fixa família (diresaun atuál), kaderneta banku ka konta bankária no númeru telefone ne’ebé ativu.
Rejistu subsídiu ba labarik
Atu rejistu subsídiu ba labarik ne’e inan-aman sira tenke lori labarik ba vizita fasilidade saúde, konsulta ho pesoál saúde no aprezenta dokumentu ba osfisiál rejistu sira.
Inan-aman tenke hatudu kartaun leitorál ka BI ka pasaporte, fixa família, kaderneta banku ka konta bankária no númeru telefone ativu.
Dokumentu ba labarik nian tenke hatudu Livriñu Saúde Inan no Oan (LISIO) no sertidaun moris nian (bainhira posível).
Rejistu ba suplementu adisionál
Rejistu ba suplementu adisonál labarik ho defisiénsia ne’e, presiza lori labarik ba vizita fasilidade saúde, konsulta ho pesoál saúde no aprezenta dokumentu sira ba ofisiál rejistu no dokumentu hanesan ho prosesu rejistrasaun subsídiu ba labarik.
No dokumentu adisionál mak sertifikadu ka deklarasaun hosi médiku kona-ba labarik nia moras króniku ka defisiénsia iha Livriñu Saúde Inan no Oan (LISIO).
Simu pagamentu
Pagamentu kada fulan sei hahú hafoin aplikasaun hetan aprovasaun. Pagamentu sei tama ba konta bankária ne’ebé nomea ka konta bankária BNCTL ne’ebé programa kria ba ita.
Subsídiu ba inan isin-rua sei para bainhira inan partu. Se inan hetan abortu, pagamentu nafatin kontinua to’o estimasaun loron partu nian.
Subsídiu ba labarik, inklui labarik ho defisiénsia sei para bainhira labarik to’o ona tinan neen (6).
Uza osan
Osan hosi subsídiu ne’e sei uza hodi tulun família ba nesesidade loron-loron nian (ai-han, transporte, ai-moruk) hodi promove inan no labarik nia saúde no nutrisaun liuhosi sosa no haan hahán oinoin ne’ebé saudável, konsulta ante-natál (ANC) dala ualu (8) no pos-natál (PNC) dala haat (4).
Nune’e mós ba fasilidade saúde atu hetan imunizasaun no monitoriza kresimentu, toba iha muskitériu laran, fase-liman ho sabaun molok haan, prepara hahán no hafoin soe bee-boot no bee-kiik.
Notísia relevante: MSSI aproxima Telkomcel halo pagamentu “bolsa da mãe jerasaun foun” iha Ainaro-Bobonaro
Jornalista : Sérgio da Cruz
Editór : Evaristo Soares Martins
