iklan

HEADLINE, MUNISÍPIU, VIQUEQUE

Guarda Florestál Viqueque halo apreensaun ai kúbiku lima

Guarda Florestál Viqueque halo apreensaun ai kúbiku lima

Ekipa Guarda Florestál asegura hela ai ne’ebé halo ona apreensaun Eskuadra PNTL Viqueque, sesta (11/11). Imajen Tatoli/Vitorino Lopes da Costa

VIQUEQUE, 11 novembru 2022 (TATOLI)—Guarda Florestál munisípiu Viqueque halo apreensaun ba ai kúbiku lima iha suku Luka, postu administrativu Viqueque Vila, munisípiu Viqueque.

“Rekerente sira foin lalais mai hasai karta lisensa ida hodi tesi ai figuera ba sosiál atu halo uma privadu. Nune’e, ami fó ona karta lisensa ba ai kúbiku tolu, hafoin ami  simu fali  informasaun katak sira tula ai hosi suku Luka atu lori bá Baucau, ida-ne’e maka ha’u orienta Guarda  Florestál ba hein iha dalan no konsege halo apreensaun ba ai hamutuk kúbiku lima,” Xefe Departamentu  Territoriál Floresta no Planta Indústriál hosi Servisu Ministériu Agrikultura no Peska (MAP) Viqueque, Helder Damião A. da C Fonseca, informa iha ninia knaar fatin, Beloi, sesta ne’e.

Notísia relevante: MAP Viqueque husu abitante labele tesi ai-parapa

Nia dehan, entidade ne’ebé hasai lisensa tesi ai liu kuantidade no la tuir kontíudu karta, nune’e Guarda Florestál hein iha Eskuadra Polísia Nasionál Timor-Leste (PNTL) hodi halo apreensaun ba ai kúbiku lima ho medida 4×6 no 5×10, iha segunda lorokraik (07/11) no daudaun ne’e sei rai hela iha edifísiu Servisu MAP Viqueque.

“Sira ne’ebé tula ai mós laiha karta lisensa, signifika sira tula ho ilegál. Atu tula sai bá munisípiu seluk tenke iha karta lisensa. Tanba  ne’e maka ami halo apreensaun tanba iha karta lisensa halo uma iha suku Luka, maibé sira tula fali bá Baucau no bainhira ami haree, sira-nia dokumentu  lisensa tula laiha,” nia akresenta.

Nune’e, parte Guarda Florestál kontinua halo identifikasaun no kontinua hein na’in ba ai, maibé to’o agora seidauk mai aprezenta-an iha edifísiu MAP Viqueque. Bainhira mai aprezenta-an maka MAP Viqueque pasa ba Diresaun Jerál Kafé no Planta MAP.

“Ami kontinua halo identifikasaun ba ai no hein ninia na’in. Diresaun Jerál Kafé no Planta sei aplika multa ka halo leilaun ba ai ne’e depende ba desizaun tanba hanesan patrimóniu Estadu,” nia tenik.

Nia dehan, bainhira aplika multa, infratór sei selu kada kúbiku $125 maka bele hasai ai ne’ebé halo apreensaun.

Guarda Florestál antes ne’e halo apreensaun ba ai teka kúbiku hitu no seluk ai teka kúbiku lima, ne’ebé infratór sira selu ona multa no foti fali ona ai, enkuantu dadaun ai teka kúbiku rua sei iha edifísiu MAP Viqueque hamutuk ai figuera kúbiku lima. 

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!