iklan

HEADLINE, MUNISÍPIU, VIQUEQUE

Autoridade Viqueque husu jerasaun foun banati tuir joven rezisténsia

Autoridade Viqueque husu jerasaun foun banati tuir joven rezisténsia

Administradór munisípiu Viqueque, Januário Soares ‘Bolly’. Imajen Tatoli/Vitorino Lopes da Costa

VIQUEQUE, 12 novembru 2022 (TATOLI)—Administradór munisípiu Viqueque, Januário Soares ‘Bolly’, husu ba joven jerasaun foun sira tenke banati tuir joven rezisténsia sira ne’ebé luta ba libertasaun.

“Ohin ita komemora loron 12 novembru 1991, joven sira uluk ne’e didika sira-nia an tomak ba luta libertasaun independénsia Timor-Leste nian. Tanba ne’e, ha’u husu joven sira agora presiza banate tuir joven sira uluk hodi dezenvolve ita-nia rai,” Autoridade Viqueque hateten iha edifísiu munisípiu Viqueque, sábadu ne’e.

Nia nota, joven agora ninia mentalidade la hanesan ona joven iha tempu rezisténsia.

“Ikus-ikus mai ne’e ita haree joven sira-nia mentalidade diferente. Iha tempu uluk joven sira haree malu hanesan maun no alin, daudaun ne’e, ita haree joven sira buka problema ba malu. Situasaun ladún di’ak bainhira ita hakarak halo dezenvolvimentu presiza iha pás no establidade. Tanba ne’e, hau hato’o mensajen ba joven sira hodi kria unidade, tenke badinas serbisu, bainhira atividade ne’ebé la fó benifísiu lalika preokupa,” nia akresenta.

Notísia relevante: Padre pároku Suai husu joven Suai kria unidade no pás

Autoridade munisipál dehan, tempu ukun rasik-an presiza kria unidade no establidade hodi lori prosesu dezenvolvimentu.

“Problema kiik sira-ne’e rai ba kotuk, ita tau maka interese komun,” nia fó hanoin.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!