DILI, 12 novembru 2022 (TATOLI)–Timor-Leste no Portugal asina ona akordu ida kona-ba formasaun ba foin-sa’e timor-oan sira iha área oioin.
Akordu ne’e realiza iha loron 27 outubru, iha Patio da Gale, Lisboa, durante delegasaun hosi Timor-Leste partisipa iha Asembleia Jerál XXXVIII, hosi Uniaun sidade kapitál lian portugés.
“Ami halo vizita ba Kámara Lisboa nia sentru atu fó formasaun ba funsionáriu públiku no dezempregu. Sentru ne’e serbisu hamutuk ho servisu sidade Dili nian atu loke vaga sira ba foin-sa’e sira atu aplika,” Prezidente Autoridade Munisípiu Dili, Guilhermina Filomena Saldanha, informa ba Agência Tatoli, iha Comoro.
Notísia relevante: TL-Portugal sei asina akordu formasaun empoderamentu ba feto
Tuir nia, sentru ne’e hakarak fó formasaun téknika, bazeia ba estudu nível kada estajiáriu hodi hatutan katak formasaun ne’e sei hala’o durante fulan-sia nia laran.
“Aleinde ne’e halo to’os, sei fó mós formasaun kona-ba empriendedorizmu ba feto foin-sa’e sira. Tanba ne’e autoridade Dili presiza koopera ho Sekretaria Estadu Formasaun Profisionál no Empregu hodi diskute formasaun espesializada no deside formasaun ne’ebé sei hala’o iha Timor-Leste ka Portugal,” nia akresenta.
Delegasaun hosi Timor-Leste ko’alia liu kona-ba nesesidade atu fó formasaun ba formadór sira tanba projetu ne’e ninia durasaun tinan-tolu de’it.
“Ita presiza identifika grupu feto Timor-Leste. Tanba ne’e, ita sei hasoru malu ho grupu feto sira atu diskute asuntu ne’e,” Prezidente Autoridade Munisípiu Dili tenik.
Aleinde asinatura ne’e, Timor-Leste mós asina akordu ida ho Prezidente Kámara Maputu, ne’ebé hateten katak sidade Dili hili ona Asembleia Jerál hosi Universidade California iha Los Angeles (UCLA) nu’udar Vise-Prezidente Komité Diretiva Uniaun ne’e ba tinan-rua.
“Ami propoin ba autoridade munisípiu Ermera, Baucau no Viqueque atu sai nu’udar observadór ba UCLA iha eventu sira tuir mai. Tanba ne’e, komunidade uniaun ne’e aprova ona ho unanimidade,” nia reforsa.
Projetu ne’e sei implementa ho kustu euro millaun 3,1 ba durasaun tinan-tolu.
Jornalista : Osoria Marques
Editora : Julia Chatarina
