NASIONÁL

TL-Portugal sei asina akordu formasaun empoderamentu ba feto

TL-Portugal sei asina akordu formasaun empoderamentu ba feto

Prezidente Aautoridade Munisípiu Dili, Guilhermina Ribeiro. Imajen Tatoli/Francisco Sony

DILI, 20 jullu 2022 (TATOLI)—Prezidente Autoridade Munisípiu Dili (PAM), Guilhermina Filomena Saldanha Riberiro, hateten Timor-Leste no Portugál liuhosi sidade Dili ho sidade Lisboa sei asina akordu kona-ba formasaun empoderamentu ba feto sira iha Timor-Leste.

“Liuhosi asina akordu iha Portugal ne’e hodi hakbiit koñesimentu ita-nia joven sira no hakbiit feto sira, nune’e bainhra sira eskola hotu saida mak bele halo iha área barak hanesan iha área ekonómia, turizmu no edukasaun,” PAM Dili hateten ba Agência TATOLI, iha nia knar fatin Matadouro, Dili, kuarta ne’e.

Hafoin asina tiha akordu mak foin hatene osan hira ba asuntu refere no osan ne’e la’ós maihosi Orsamentu Jerál Estadu (OJE) maibé osan ne’e apoiu hosi Uniaun Europeia.

Atu implementa formasaun ne’e sei integra ho parte Sekretaria Estadu Formasaun Profisionál no Empregu (SEFOPE) no Institutu Apoiu Dezenvolvimentu Emprezariál (IADE), Universidade da Califórnia em Los Angeles (UCLA) no sei servisu hamutuk ho grupu Asosiasaun Molheres Timor-Leste (AMTL), nune’e sira mós fó netik buat ruma hanesan fó formasaun hodi ajuda no aumenta sira-nia koñesimentu iha área refere.

“Ha’u bele hateten katak iha Munisípiu Dili, grupu feto potensiál ne’ebé mak sira sempre hakbesik an no hatudu sira-nia kapasidade oinsá atu dezenvolve buat ruma hanesan halo dezenvolvimentu iha setór ekonómia,” nia dehan.

Nia dehan, presiza halo atividade ida-ne’e tanba maluk feto barak mak envolve an iha setór ekonómia no setór sira seluk.

“Ha’u mós haree feto maluk balun ne’ebé servisu iha agrikultura hanesan kuda modo iha Hera nian no ha’u hanoin área ne’e área produtivu,” nia dehan.

Polítika Munisipál nian atu promove partisipasaun feto iha dezenvolviementu ekonómia, kulturál no seluk tan, nia hatán ba asuntu ne’e liuhosi Administrasaun Postu sira fó informasaun ba feto sira kona-ba kreditu liuhosi Banku Nasionál Komérsiu Timor-Leste (BNCTL) ka liuhosi mós Ministériu Turizmu Komérsiu no Indústria (MTCI).

Tanba, tuir nia, iha pandemia COVID-19 ne’e grupu ekonómia balun monu no balun konsege hamoris an fila-fali no iha balun ne’ebé lakon.

“Ne’e mak dehan ita-nia ekonómia, entaun presiza ho aten boot no aten brani, nune’e presiza dixiplina iha ezekusaun,” nia dehan.

Ho asuntu empoderamentu ne’e, nia enkoraja joven feto sira atu labele tauk tanba atividade hotu-hotu sempre iha nia risku.

“Ha’u hanoin atu enkoraja joven sira mak ne’e, labele tauk. Primeiru mak bainhira ita atu halo atividade ida sempre iha risku katak fó formasaun para ita hadi’a hodi hamenus risku ne’e. Tanba ne’e presiza ita halo jestaun di’ak, kuandu ita halo buat ruma dia’k hanesan halo ekonómai tenke halo ida-ne’e,” nia dehan.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!