iklan

NASIONÁL, HEADLINE, SEGURANSA

AMN propoin halakon desizaun sosa karreta ba deputadu ho períodikamente

AMN propoin halakon desizaun sosa karreta ba deputadu ho períodikamente

Aliansa Maubere Nasionál halo asaun protestu hasoru desizaun Parlamentu Nasionál atu sosa karreta no laptop foun ba deputadu sira, iha kampus sentrál UNTL oin, segunda (14/11). Imajen Tatoli/Francisco Sony

DILI, 14 novembru 2022 (TATOLI)—Aliansa Maubere Nasionál (AMN) haruka ona karta ofisiál ba Parlamentu Nasionál atu husu halo audiénsia ho Prezidente Parlamentu Nasionál, Aniceto Guterres, atu halakon desizaun sosa karreta ba deputadu ho períodikamente.

Portavós AMN, Gaspar Maugamu, hateten, inisiativa ne’e tanba sira ladún fiar ho desizaun Parlamentu Nasionál (PN), ne’ebé deside ona halo kansela sosa karreta Pajero Sport ba deputadu sira tanba referénsia ne’ebé akontese iha tinan 2017, bainhira PN hala’o kanselamentu, sira halo filafali prosesu seluk.

“Ami haruka ona karta formál ba Parlamentu Nasionál atu husu audiénsia ho Prezidente Parlamentu Nasionál, ami hein de’it posibilidade atu halo audiénsia ho ami. Tanba ami haree desizaun Parlamentu hodi halo kanselamentu sosa karreta ba lejizlatura ida-ne’e, maibé ba lejizlatura tuir mai bele kontinua sosa fali karreta,” Gaspar Maugamu hateten iha ámbitu asaun pasífika iha kampus Sentrál Universidade Nasionál Timor-Leste (UNTL), segunda ne’e.

Notísia relevante: PN kansela sosa karreta Prado ba deputadu sira

AMN konsidera, desizaun sira ne’e hanesan manipulasaun polítika ba povu, tanba ne’e aliansa foti desizaun hodi submete karta ba PN.

“AMN nia ezijénsia la’ós atu kansela ka hapara de’it sosa karreta ba lejislatura ida-ne’e, maibé atu hapara tradisaun sosa karreta ba deputadu sira ho períodikamente. Signifika ba períodu sira tuir mai mós sei labele sosa tan karreta ba deputadu sira,” nia tenik.

Tuir Reprezentante aliansa, osan ne’ebé halo kansela sosa karreta bele aloka ba servisu operasionál tanba kustu manutensaun karreta operasionál no karreta ba deputadu sira ne’e unidade la hanesan.

Iha sorin seluk, nia rekoñese, daudaun ne’e iha ona membru Polísia Nasionál Timor-Leste (PNTL) hosi Unidade Batallaun Orden Públiku (BOP) no Forsa Polísia Rezerva maka halo ona vijilánsia iha manifestasaun.

“Ami prontu nafatin mantein pozisaun maski ami sei hetan intervensaun hosi Polísia ho sira-nia forsa. Asaun ne’e ami halo atu ezije audiénsia ho Prezidente Parlamentu Nasionál hodi husu altera lei sosa karreta ba deputadu sira. Bainhira asaun ne’e la hetan resposta maka ami sei halo asaun tuir mai ho nonook,” nia tenik.

Polísia detein estudante no sosiedade sivil 37 halo asaun kontra PN

PNTL detein ona estudante universitáriu no sosiedade sivil 37, kompostu hosi mane 34 no feto tolu, ne’ebé envolve-an iha asaun pasífika kontra desizaun PN hodi sosa karreta Pajero Sport ba deputadu sira.

Daudaun ne’e, Polísia lori estudante sira  ba sela detensaun Komandu Polísia Dili hodi kumpre oras 72 nia laran molok submete ba prosesu investigasaun.

Tuir observasaun Agência Tatoli iha terrenu, nota katak molok Polísia atu halo intervensaun uza forsa hapara asaun pasífika ne’ebé manifestante sira halo iha areadór kampus sentrál UNTL nia oin, ekipa Polísia hosi Diresaun Komunikasaun halo ona avizu ba manifestante sira atu hapara asaun pasífika tanba asaun ne’e konsidera la hetan koñesimentu.

“Ami husu ba manifestante sira atu hapara ita-boot sira-nia asaun pasífika ne’e tanba ita-boot sira-nia asaun ne’e laiha karta koñesimentu. Tanba ne’e, ami husu atu husik fatin ne’e mamuk atu labele disturba atividade públika inklui prejudika prosesu debate Orsamentu Jerál Estadu 2023 iha Parlamentu,” nia dehan.

Hosi intervensaun ne’ebé Polísia hato’o liuhosi avizu dala-tolu ba manifestasaun sira, maibé kontinua hala’o nafatin asaun no ikus mai Komandu hatún orden ba ninia membru BOP no Polísia Forsa Rezerva hodi halo atuasaun ho profisionál hapara manifestante sira iha asaun pasífika ne’e.

“Estudante 37 hosi asaun pasífika ne’ebé detein ona iha sela sei hein prosesu investigasaun tuir mai,” nia dehan.

Jornalista    : Tomé Amado

Jornalista    : Julia Chatarina

iklan
iklan

Leave a Reply

iklan
error: Content is protected !!