DILI, 11 novembru 2022 (TATOLI)—Deputadu sira iha Parlamentu Nasionál, sesta ne’e, deside kansela sosa karreta Prado 30 ba deputadu foun iha lejislatura daneen, iha debate proposta-lei Orsamentu Jerál Estadu (OJE) 2023 faze espesialidade iha loron daruak.
Notisia Releavate: Meza PN simu proposta hasai osan sosa karreta Prado
“Rezultadu votasaun proposta númeru 14, a-favór 38, kontra 1, abstesaun 20, nune’e pasa,” Prezidente PN, Aniceto Longuinhos Guterres Lopes, fó sai iha sala plenária PN.
Antes ne’e iha loron 03 fulan outubru tinan ne’e deputadu sira iha PN aprova orsamentu privativu hosi PN ho montante $17.975.704 ba tinan fiskál 2023 aprovadu ho rezultadu votasaun a-favór 45, kontra ida (1) no abstensaun 11.
Maibé iha diskusaun proposta-lei OJE 2023 iha faze espesialidade deputadu sira halo proposta hamutuk 14 atu hasai osan hosi orsamentu PN hanesan re-aloka fali ba programa seluk iha PN no tau fali ba ministéiru seluk.
Maibé hosi proposta 13 proponente sira deside retira fali no proposta ida husu hasai osan sosa kareta Prado mak la retira.
Proposta ho númeru 14, proponente hosi Deputadu, Marito Mota (Fretilin) ho Olinda Guterres (Khunto) hato’o atu hasai osan millaun $1.950 hodi re-aloka hodi sosa kareta Prado ba fali programa seluk PN nian.
Hanesan ajusta fali iha PN nia orsamentu rasik dahuluk ho rihun $771.508 aloka programa boa-governasaun ba atividade estabelesiemntu funsionamentu tribunál no daruak aloka rihun $178.492 halo selebrasaun akordu koorperasaun PN Timor-Leste ho PN Indonézia ho atividade foun no millaun $1 aloka fundu infraestrutura atu konstrui ba edifísiu PN.
“Razaun ne’e fundamentu no Prezidente Parlamentu rasik inisíu la konkorda atu sosa karreta iha tinan oin iha parte seluk públiku kestiona makaas, fiar katak kolega deputadu sira a-favór proposta ne’e,” nia fundamenta.
Hafoin votasaun ba proposta númeru 14, deputadu sira mós halo votasaun espesialidade ba proposta OJE 2023 hosi PN ho ajustamentu ne’ebé ho rezultadu a-favór 37 kontra 0 no abstensaun 22, nune’e aprovadu.
Orsamentu privativu hosi Parlamentu Nasionál (PN) ho montante $17.975.704 ba tinan fiskál 2023 aprovadu ho rezultadu votasaun a-favór 45, kontra ida (1) no abstensaun 11.
Orsamentu privativu PN ho montante $17.975.704 ne’ebé koloka ba saláriu bensimentu millaun $5.791 (32%), bens no servisu millaun $6.569 (37%), transferénsia públika millaun $1.487 (8%), kapitál menór millaun $3.879 (22%) no kapitál dezenvolvimentu rihun $250 (1%).
Hosi montante orsamentu ne’e, kontinua ho planu ne’ebé asenta ba programa lima hanesan; hasa’e relasaun internasionál no kooperasaun parlamentár, garante ezersísiu funsaun konstituisionál Parlamentu, promove kultura transparánsia iha Parlamentu, promove igualidade jéneru iha Parlamentu no boa governasaun no jestaun instituisionál.
Notisia Releavate: PPN konvida deputadu sira reve polítika sosa karreta Prado
Jornalista : Nelson de Sousa
Editór : Cancio Ximenes
