iklan

NASIONÁL, POLÍTIKA

Meza PN simu proposta hasai osan sosa karreta Prado

Meza PN simu proposta hasai osan sosa karreta Prado

Membru Governu ho Parlamentu Nasional, hala'o diskusaun jeneralidade Proposta OJE tinan 2023, iha sala plenáriu PN, kuarta (09/11). Imajen TATOLI/Francisco Sony

DILI, 10 novembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, fó sai katak meza simu ona proposta besik 100 hosi deputadu sira iha inklui proposta atu hasai osan ne’ebé PN tau atu sosa karreta Prado iha debate faze espesialidade ba proposta lei Orsamentu Jerál Estadu (OJE) 2023.

Notísia Relevante: PPN konvida deputadu sira reve polítika sosa karreta Prado

“Meza PN simu ona prospota besik 100 no ita bele dehan barak la admite. Proposta ne’ebé admite hanesan husu atu hasai osan hosi Prezidénsia Repúblika nian, proposta seluk kona-ba Parlamentu Nasionál iha 10 hotu-hotu atu hasai osan ida atu sosa karreta ba deputadu sira-nian millaun $1-resin maibé proposta tama ha’u sura besik millaun $10,” Prezidente PN ne’e hateten iha debate proposta lei OJE 2023 ba loron dahuluk iha PN, kinta ne’e.

Proposta sira-ne’ebé la admite, primeiru proposta atu aumenta tetu orsamentu.

“Iha razaun barak la admite lei grande opsaun ita aprova define tiha ona tetu orsamentu ida-ne’e mak Governu submete mai, nune’e kestaun legál meza la adimite. No iha enkontru lider bankada deside konsensu ona katak tetu mak ida-ne’e ona,” nia klarifika.

Nune’e mós, proposta atu hasai osan hosi fundu kontijénsia ida agora montante millaun $65 hanesan ne’e, hela de’it 2% hosi orsamentu no iha lei orsamentu previstu katak 5%.

“Agora montante ne’ebé iha tiha ona proposta ida mínimu loos, ida-ne’ebé iha ne;e mak por obrigasaun legál meza la admite proposta sira atu hasai osan,” Aniceto dehan.

Ida seluk mós proposta sira-ne’ebé la admite atu hasai osan hosi fundu COVID-19, tanba meza konsidera iha kinta (10/11) dadeer ne’e PN foin aprova lei medida exesionál COVID-19.

Nia dehan, proposta sira tama soma ba hamutuk nia valór millaun $40 enkuantu fundu COVID-19 iha de’it millaun $18.

Proposta seluk la admite mós atu hasai osan hosi Rejiaun Administrativu Espesiál Oé-Cusse Ambeno. Tuir Aniceto Guterres, la’ós labele hasai maibé proposta ne’e hasai laiha sentidu ida tanba RAEOA di’akliu no osan ne’e retira mós la fila ba kofre Estadu.

Mezmu meza la admite proposta sira-ne’e, proponente sira hakarak halo rekursu bele halo no plenária mak soberanu maibé tenke hatene fó prioridade.

Nune’e meza PN fó sai ba proponente sira bele reformula proposta sira, prazu to’o aban dadeer tuku 09h00.

Deputada PD, Elbina de Sousa, hateten nia-parte halo rekursu ba proposta la admite tanba tuir artigu 66 rejimentu PN fó dalan hodi deputadu bele halo rekursu.

“Ha’u-nia proposta ne’ebé la admitidu (por volta hamutuk neen) rekore ba plenária hodi hetan konsiderasaun hosi deputadu sira seluk, tanba proposta alterasaun sira-ne’e importante tebes hanesan deputadu iha direitu,” nia fundamenta.

Notísia Relevante: Ohin, PN-Governu debate proposta-lei OJE 2023 iha faze espesialidade

Proposta ida ba Ministéiru Negósiu Estranjeiru no Kooperasaun (MENK) hanoin atu apoiu tan reforsa millaun $5 serbisu konsolár iha Portugál, no proposta seluk foti hosi fundu COVID-19 hodi resposta ba MNEK mós hodi haree bazea ba audiénsia.

Proposta seluk hola veíkulu ba Unidade Espesiál Polísia (UEP) no Unidade Polísia Fronteira (UPF), presiza karreta apoiu serbisu no konstrui infraestrutura ba autoridade protesaun sivíl iha munisípiu sira.

“Ne’e obrigasaun hanesan ami komisaun B deteta hanoin proposta alterasaun sira-ne’e iha hodi apoiu Governu iha implementasaun programa sira,” nia hateten.

Deputada CNRT, Virgina Ana Belo, hateten durante iha diskusaun jeneralidade nafatin kestiona ezekusaun no orsamentu ne’e por programa dalaruma hakarak aumenta tan orsamentu ba ministéiru balun maibé sukat nia kapasidade atu ezekuta ka lae.

Deputada CNRT, Maria Bareto, dehan kona-ba fundu COVID-19 iha membru komisaun F tau proposta prioridade iha asuntu saúde liuliu ba iha ambulánsia no mós SAMES, I.P hodi halo akizisaun ba médikamentu.

“Ami-nia razaun no tuir fiskalizasaun hasai osan hosi fundu COVID-19 tanba liga ho setór saúde ninian, se bainhira iha pandemia ruma mak tama mai Timor-Leste klaru atu evakua pasiente uza ambulánsia no atende pasiente presiza ai-moruk,” nia hateten.

Deputadu PD, Adriano do Nacimento, dehan antes debate jeneralidade lidér bankada sira halo ona desizaun konsensu atu la foti tan osan mina-rai nian hodi labele aumenta tetu no la foti osan hosi fundu kontijénsia.

Ministru Finansa, Rui Augosto Gomes, responde katak fundu kontijénsia no fundu COVID-19 nian ne’e labele book.

“Fundu COVID-19 ne’e iha millaun $18 atu sosa ai-moruk vasina, kontratasaun pesoál, konstrusaun ne’ebé seidauk ramata tinan ne’e no seluk tan, no tanba fundu kontijénsia ita seidauk hatene derrepente iha surtu ruma depois ita foin hakfodak osan laiha, entaun sujere labele book,” nia hateten.

Governante ne’e hato’o kona-ba ambulánsia tinan ida-ne’e rasik Ministéiru Saúde sei halo akizisaun ambulánsia multifunsaun ualu (8) no hetan doasaun hosi banku mundiál ualu (8) hodi apoiu sentru saúde sira, ida-ne’e jestaun ne’ebé di’ak bele ajuda ona.

Nune’e, hosi Governu sujere di’akliu deputadu sira husu hamutuk ho membru Governu sira halo ezersísiu internu kada liña ministeriál saida mak bele muda iha laran duké ita foti hosi fatin ida ba tau fali fatin seluk.

Notísia Relevante: Debate espesialidade proposta OJE 2023, meza PN simu ona proposta 90

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!