iklan

DILI, POLÍTIKA

PPN konvida deputadu sira reve polítika sosa karreta Prado

PPN konvida deputadu sira reve polítika sosa karreta Prado

Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 09 novembru 2022 (TATOLI)—Prezidente Parlamentu Nasionál, Aniceto Longuinhos Guterres Lopes, konvida deputadu sira revee politika atu fasilita transporte ka sosa karreta Prado ba reprezentante povu iha uma fukun Parlamentu Nasionál.

Notísia Relevante: PN mantein sosa karreta prado 30 iha 2023

“Ha’u konvida deputadu sira mai ita atu revee politika atu fasilita transporte ba deputadu sira, ida polítika sosa karreta ne’e sala tiha ona no hau konkorda ho estudante no joven sira agora halo manifestaun ne’e,” Prezidente PN hato’o pozisaun ligadu ho asaun pasífika hosi universitáriu kona-ba atu sosa kareta Prado ba deputadu sira, iha diskusaun proposta-lei Orsamentu Jerál Estadu (OJE) 2023 iha faze jeneralidade iha PN, kuarta ne’e.

Nune’e, Aniceto Guterres laiha objesaun ruma bainhira diskusaun proposta OJE iha faze espesialidade iha proposta atu hasai tiha osan ne’ebé antes ne’e atu sosa karreta Prado 30 ba deputadu sira.

“Sosa karreta ba Parlamentu Nasionál nian iha proposta atu hasai tiha osan ba viatura ninian, ha’u laiha objesaun no plenária mak soberanu, se iha proposta ruma iha debate espesialidade atu hasai,” nia dehan.

Nune’e, to’o ona tempu atu haree reve polítika oinsá atu fasilita transporte ba deputadu sira liuliu oinsá atu atribui de’it subsídiu transporte ba deputadu sira.

“Governu hakat tiha ona polítika ida ba kargu xefia sira, agora parese la atribui karreta atribui de’it subsídiu transporte, lei estatutu deputadu hateten iha ne’eba deputadu sira iha direitu ba transporte maibé la signfika tenke hetan karreta interpretasaun ida-ne’e iha 2007. Iha segunda lejislatura uluk, Fretilin kontra sosa karreta, loloos atribui deit subsídiu transporte,” nia hateten.

Maibé, nia dehan, agora sosa tiha ona kaereta no ohin loron problema hela de’it, entaun tenke haree fila-fali polítika ida-ne’e. Karik  bele, tuir Governu ninian define subsídiu transporte ho montante ne’ebé razoavel, tanba bainhira sosa karreta ne’e mak problema hela de’it hahú kedas  iha akizisaun, aumenta despeza bo’ot.

“Hahú kedas prosesu akizisaun segundu lejislatura akizisaun kaereta Pajero osan tau ba Prado maibé sosa Pajero, problema lori malu ba tribunal. Dedepois karreta Pajero la to’o tan tinan lima halo leilaun maibé manifestasaun ida laiha kona-ba ida-ne’e,” nia hateten.

Tuir Prezidente PN ne’e, despeza aumenta selu motorista 65, subsídiu kombustivel kada fulan, subsídiu kada tinan, subsídiu manutensaun.

“Manutensaun ne’e problema liután karreta sira lori ba ofisina buat ki’ik-oan ida hadi’a bainrua aat fali ona mais kustu ne’e ejazeradu. Satán karreta foun de’it lori ba ofisina, deputadu sira hetan kombustivel atu ba munisípiu, Xefe Bankada Khunto dala ida parese hakarak koko Pertamina fó duni litru hanesan ka la’e hanesan iha cheinas ne’e lori jerigen ba litru 30 nian ho kupon litru 30 nian enxe ba, afinál to’o metade de’it, kompaña mina no ofisina sira esplora Estadu aat liu,” nia dehan.

Entaun atu evita buat sira-ne’e hotu tenke muda polítika oinsá fasilita transporte ba deputadu sira hodi redús despeza hira.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!