iklan

DILI, POLÍTIKA

PN mantein sosa karreta prado 30 iha 2023

PN mantein sosa karreta prado 30 iha 2023

Estudante no joven sira-ne’ebé halibur an iha Aliansi Movimentu Nasionál (AMN) halo asaun protestu hasoru PN ne’ebé planea atu sosa karreta no laptop foun ba deputadu sira. Asaun ne’e halo iha kampus UNTL nia oin, segunda (07 novembru 2022). Imajen Tatoli/António Daciparu.

DILI, 07 novembru 2022 (TATOLI)—Vise Prezidente Parlamentu Nasionál, Maria Angelina Sarmento, hateten PN mantein sosa karreta Prado ba deputadu iha lejislatura foun mai iha tinan 2023.

Notísia Relevante: Orsamentu privativu PN aprovadu

“Klaru, ida-ne’e sosa. Públiku atu hatene katak sosa karreta ba deputadu sira nova lejislatura  atu mai ne’e la’ós ba ami deputadu sira agora mandatu hela fulan hirak tan atu hotu ona ne’e,” Vise Prezidente PN ne’e deklara ba jornalista sira relasiona ho asaun pásifika hosi estudante universitáriu Aliansa Maubere Nasionál (AMN) hasoru PN, iha PN, segunda ne’e.

Nia hatutan, tanba ne’e mínimu kondisaun ba sira atu hala’o serbisu kompara ho deputadu sira tama iha tinan 2017 no 2018, ne’ebé sosa krareta 35 aumenta ho 30 hodi iha tinan 2023 deputadu sira-ne’ebé eleitu bele utiliza.

”Kompara ha’u rasik tama iha 2018, ha’u uza ha’u-,nia karreta privadu na’in rasik mak lori durante fulan rua hanesan ne’e, depois mak PN foin fó karreta operasionál ne’ebé durante ne’e funsionáriu sira uza hela, hodi uza hala’o ha’u-nia kna’ar hanesan povu nia reprezentante,” nia dehan

Tan ne’e, Vise PN ne’e hateten, lojíka estudante sira hala’o manifestasaun ba loos de’it karreta PN nian ne’ebé mandatu konstituisional.

“Ami tenke halo fiskalizasaun, nusa sira (estudante) la ba fiskaliza Governu nia diretór sira até diretór sira mós karreta Prado hanesan ho deputadu sira, hira mak Governu la sosa. Se sira analiza didi’ak orsamentu tinan ida-ne’e mós akizisaun ba veíkulu ba Governu millaun ida ne’e sira la haree hetan,” nia argumenta.

Tanba ne’e, transporte meiu la’ós objetivu, no nia konsidera ida-ne’e mak la tama iha lójika maibé bele iha liberdade espresaun estudante sira hato’o maibé tenke analítiku maibé lahó analiza, balansu iha ne’ebe haree loos de’it PN nian.

Tanba transporte ne’e meiu atu fasilita deputadu sira tuir mandatu konstituisionál kna’ar ida hosi PN mak atu halo fiskalizasaun.

“Atu halo fiskalizasaun la’ós povu mak mai buka ami maibé ami mak tenke ba no ami ba transporte laiha ami bele hala’o viajen ba suku ka iha aldeia ida iha Baucau besik foho matebian nian hun ne’eba, sira laiha estrada Governu la to’o ba ne’eba haree, entaun  ami mak iha responsabilidade atu ba buka hatene, nia lójika mak ida-ne’e,” nia hateten.

Entertantu, antes ne’e deputadu sira iha Parlamentu Nasionál aprova orsamentu millaun $1-resin ne’ebé aloka ba sosa karreta foun 30 ba deputadu sira no laptop 65.

Desizaun ne’e foti liuhosi diskusaun no aprovasaun ba proposta orsamentu privativu Parlamentu Nasionál nian ba tinan fiskál 2023.

Hosi totál orsamentu millaun $1.950 ne’ebé aloka ba sosa karreta foun no kada karreta sei sosa ho folin rihun $65, no proposta sosa karreta ne’e hetan aprovasaun ho votu a-favór 45, kontra ida no abstensaun 11.

Vise Bankada Fretilin, Antoninho Bianco, husu atu lejislatura dalimak mai di’ak liu foku ba objetivu saida mak atu halo no entrega sosa karreta foun ba lejislatura tuir mai.

“Agora ita sosa tan karreta, ha’u hanoin proposta ne’e elimina tiha, husik aban-bainrua iha lejislatura daneen mesak halo ne’ebé lejislatura dalima ne’e ko’alia saida mak ita atu halo,” Bianco hato’o molok aprova orsamentu privativu PN, (03/10) foin lalais.

Nune’e mós, Vise Bankada PLP, Francisco de Vasconcelos, preokupa ho folin karreta no PN bele kompleta karreta 30 nune’e deputadu na’in 65 bele sa’e karreta foun maibé tenke haree ba nia presu ne’ebé razoavel.

“Kompleta bele maibé nia presu ne’e razoavel kala’e, presu ida uluk $40 mill depois agora $65 mill,” nia hateten.

Tuir nia, atu labele hatodan liu pezu orsamentu PN nian  di’akliu hasai tiha osan ba sosa karreta foun, husik aban bainrua deputadu foun mai mak haree fali nia orsamentu.

Xefe Bankada CNRT, Duarte Nunes, hateten desizaun sosa karreta foun ba deputadu ne’e seidauk finál no bele mosu proposta alterasaun iha diskusaun no aprovasaun Osamentu Jerál Estadu OJE 2023 iha faze espesialidade.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!