DILI, 03 outubru 2022 (TATOLI)-Orsamentu privativu hosi Parlamentu Nasionál (PN) ho montante $17.975.704 ba tinan fiskál 2023 aprovadu ho rezultadu votasaun, a-favór 45 , kontra ida no abstensaun 11.
“Nune’e orsamentu privativu Parlamentu Nasionál ba 2023 hanesan aktu formalizasaun ida aprovadu’’, Prezidente Parlamentu Nasionál, Aniceto Longuinhos Guterres Lopes, anúnsia liuhosi plenária, segunda ne’e.
Orsamentu privativu PN ho montante $17.975.704 ne’ebé koloka ba saláriu bensimentu millaun $5.791 (32%), bens no servisu millaun $6.569 (37%), transferénsia públika millaun $1.487 (8%), kapitál menór millaun $3.879 (22%) no kapitál dezenvolvimentu rihun $250 (1%).
Hosi montante orsamentu ne’e kontinua ho planu ne’ebé asenta ba programa lima hanesan; hasa’e relasaun internasionál no kooperasaun parlamentár, garante exersísiu funsaun konstituisionál parlamentu, promove kultura transparánsia iha parlamentu, promove igualdade jéneru iha parlamentu no boa governasaun no jestaun instituisionál.
Entertantu, tuir portal transparánsia Ministéiru Finansa (MF) to’o iha loron segunda ne’e (03/10/2022) fó sai katak orsamentu privativu 2022 PN ho montante $16,210,224.00. Hosi orsamentu ne’e nia orijen $16,210,224.00, kompromisu sira $370,532.15, obrigasaun sira $1,410,991.90, atuál $8,798,383.75, saldu $5,630,316.20 no nia ezekusaun 63.0%.
Notísia relevante: Parlamentu Nasionál sei fó atensaun diskute OJE 2023
Jornalista : Nelson de Sousa
Editora : Rita Almeida
