iklan

EDUKASAUN, HEADLINE

Eskola Heroi da Pátria adia ezame pasajen klase

Eskola Heroi da Pátria adia ezame pasajen klase

Ilustrasaun ezame. Imajen/Espesiál

DILI, 14 novembru 2022 (TATOLI)—Dirijente Eskola Ensinu Sekundáriu Privadu (ESP) Heroi da Pátria, Becora, deside adia ezame pasajen klase ba loron kuarta (16/11) tanba estudante barak maka seidauk marka prezensa.

“Ohin ita anúnsia ona ba estudante sira katak ezame pasajen klase iha ita-nia eskola sei adia ba loron kuarta. Tanba ne’e, husu ba estudante sira atu marka prezensa iha loron ne’ebé termina ona,” Adjuntu Diretór Eskola ESP Heroi da Pátria, Julianus Magalhães, informa ba Agência Tatoli, via telefónika, segunda ne’e.

Daudaun ne’e eskola rejista estudante hamutuk 300 resin maka sei partisipa iha ezame, maibé presiza hein ezame hodi identifika kuantidade estudante ne’ebé marka prezensa.

“Ita iha estudante 300 resin maka rejistadu, maibé ita atu hatene loloos sira tuir hotu ezame pasajen klase ka lae, presiza hein ba kuarta mak foin bele identifika,” nia akresenta.

Notísia relevante: MEJD altera kalendáriu ezame pasajen klase

Nune’e mós, Diretór Eskola Ensinu Sekundáriu Jerál (ESJ) Finantil Ai-mutin, Hermenegildo Mascarenhas, konfesa katak sira iha estudante provizóriu iha eskola hamutuk 804, ne’ebé estudante sira ne’e maka tama iha kategoria ativu iha prosesu ensinu aprendizajen durante ne’e.

“Ita la hatene iha prosesu ezame pasajen klase dadus bele aumenta ou bele menus. Tanba ne’e, ita hein ezame hotu maka ita bele hatene loloos,” nia tenik.

Iha sorin seluk, Diretór Eskola ESJ 04 setembru UNAMET Balide, Martinho de Menezes, hateten, sira kumpre duni kalendáriu ne’ebé Ministériu Edukasaun Juventude no Desportu (MEJD) altera no kontinua realiza ezame ba estudante sira, nune’e hasoru difikuldade iha preparasaun matéria ezame.

Ba kestaun ne’e, Dirijente ne’e ezije profesór sira atu halo esforsu maka’as ho razaun profesór ne’ebé konsege kompleta matéria ezame bele hatama ona no profesór ne’ebé la konsege tenke buka maneira atu estudante sira bele hetan valór, maibé ho esforsu ne’ebé iha, profesór sira hotu kompleta matéria ezame ba estudante sira.

Daudaun totál estudante ensinu sekundáriu 10o no 11o ano rejistadu atu partisipa iha ezame pasajen klase hamutuk 2.705, maibé iha ezame sei identifika númeru loloos.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!