DILI, 09 novembru 2022 (TATOLI)—Ministériu Edukasaun Juventude no Desportu (MEJD) ne’ebé antes ne’e determina ezame pasajen klase iha loron 21 novembru 2022, altera fali ba loron 14 novembru 2022, nune’e fó biban ba ministériu hodi halo atribuisaun prémiu ba estudante mellór klasifikadu.
Ministru Edukasaun Juventude no Desportu, Armindo Maia, hateten, alterasaun kalendáriu ezame pasajen klase ne’e ba estudante ensinu báziku primeiru no segundu siklu, ensinu sekundáriu inklui tékniku vokasionál tanba ministériu hakarak aselera programa atribuisaun prémiu bolsa méritu ba estudante sira ne’ebé hetan klasifikasaun di’ak iha ezame nasionál no ezame pasajen klase.
“Ita halo alterasaun ba kalendáriu ezame pasajen klase atu ita bele iha tempu kurriji rezultadu ezame, nune’e iha dezembru nia laran ita bele halo atribuisaun ba estudante sira,” Ministru relata ba Agência Tatoli iha resintu Parlamentu Nasionál, kuarta ne’e.
Governante ne’e konsidera, alterasaun ne’ebé ministériu halo sukat ba kondisaun balun, karik mosu reklamasaun, bele iha tempu atu rezolve kestaun sira, tanba ne’e Ministru husu ba eskola sira hotu atu kumpre nafatin desizaun ne’ebé ministériu hatún hodi prepara matéria ezame ba estudante sira ho di’ak.
Notísia relevante: MEJD prepara ona millaun $7 ba estudante mellór klasifikadu
Iha fatin ketak, Diretór Eskola Ensinu Sekundáriu Jerál (ESJ) Heroi da Patria, José Dias Guterres, konsidera desizaun MEJD halo alterasaun ba kalendáriu ezame pasajen klase ne’e prejudika prosesu korresaun pontu ezame lokál.
“Ha’u nu’udar diretór eskola no veteranu ida la konkorda ministériu halo alterasaun filafali kalendáriu ezame pasajen klase ba loron 14 novembru, tanba ami halo hela korresaun pontu ezame lokál durante loron-tolu, hahú segunda to’o kuarta, oinsá ami atu halo preparasaun ba matéria sira. Ministériu kontinua mantein ho data ne’ebé altera ona ka fó tempu ba eskola sira atu finaliza korresaun pontu ezame lokál hafoin hahú filafali ezame pasajen klase, maibé buat hotu halo urjente ne’e ladún di’ak ba eskola sira,” nia tenik.
Nune’e mós, Adjuntu Diretór Eskola Ensinu Sekundáriu Paulo VI, Atanásio da Silva, dehan, daudaun ne’e sira agora halo hela preparasaun ezame pasajen klase tuir kalendáriu ne’ebé maka altera ona hosi MEJD, ne’ebé sei hahú segunda agora. Aleinde ne’e prepara hotu ona matéria ezame no agora entrega ona ba sekretariadu eskola atu halo kopia atu segunda agora estudante sira bele hahú ezame.
“Ami kontinua fó hanoin nafatin ba estudante sira atu nafatin partisipa iha prosesu ensinu aprendizajen aula prezensiál atubele hetan matéria sufisiente hodi nune’e bele halo preparasaun di’ak liután iha eskola no uma.
Jornalista : Tomé Amado
Editora : Julia Chatarina
