iklan

NASIONÁL, POLÍTIKA

Festivál múzika-kultura Ataúro, promove kultura nu’udar identidade úniku

Festivál múzika-kultura Ataúro, promove kultura nu’udar identidade úniku

Koordenadór Festival Múzika no Kultura Ataúro, Azevedo Marçal. Imajen Tatoli /Egas Cristovão

DILI, 14 novembru 2022 (TATOLI)—Koordenadór Festivál Múzika no Kutura iha Ataúro, Azevedo Marçal, hateten festival no kultura ne’e atu esplora identidade kultura, turizmu hodi promove no proteje kultura nu’udar identidade úniku iha Timor-Leste.

Notísia Relevante: Governu aloka $20.000 ba festivál kulturál iha Ataúro

“Objetivu prinsipál husi ita-nia festival ida ne’e mak atu esplora identidade kultura no Turizmu Timoroan nian, promove no proteze kultura nu’udar identidade úniku Timor-Leste ne’ebé bele atrai turista sira hosi rai-laran no mós hosi rai-li’ur,” Koordenadór Festivál Múzika no Kutura iha Ataúro, Azevedo Marçal, hateten ba jornalista sira, hafoin halo enkontru ho Prezidente Repúblika, José Ramos Horta, iha Rezidénsia Palásiu Prezidente Ai-tarak Laran, Díli, segunda ne’e.

Objetivu daruak, nia dehan, hosi festivál ida-ne’e mak hasa’e kreatividae joven Timoroan iha área arte no kultura, no mós ko’alia kona-ba sensibilizaun identidade kultura ba jerasaun foun sira. Objetivu datoluk mak promove pás, estabilidade no unidade nasionál,” nia esplika.

Tuir nia, durante Festivál Múzika no Kultura iha Ataúro iha atividade sira-ne’e, iha grupu tolu (3) mak hanesan, primeiru sei halo atividade hamutuk ualu (8) mós sei iha konkursu haat (4), modalidade hamutuk haat (4).

Atividade ne’ebé kobre mak múzika instrumentál, tradisionál, tais tradisionál hosi munisípiu 14, hosi ne’e sei husu atu Embaixadór sira hosi rai-li’ur sira ida-idak hatais tais Timor-Leste nian hosi munisípiu ida-idak, hodi promove Timor nia tais.

Atividade kluturál seluk mak soru tais, kompetisaun tein ai-han tradisionál no mós ai-han internasionál ne’ebé ekipa Indonézia ida sei mai partisipa.

“Aleinde ne’e, ita mós hakarak oinsá kuda mangrove ka ai-parapa atu hamatak illa Atauro, marsa moradór sira, dansa tradisionál, feira livru no espozisaun pintura. Ida-ne’e mak atividade ualu (8) ne’ebé ita sei halo iha ne’ebá. Aleinde atividade sira-ne’e, ita mós iha konkursu kompetisaun sira iha tasi no rai-maran no mós sei iha Ataúro Adventure, noite poema, pintura, múzika kore-metan, hosi ne’e sei iha korida ró, nani taru, halai sa’e foho no korida bisikleta,” nia dehan.

Kona-ba finansiamentu Prezidénsia Repúblika mak apoiu no hetan mós apoiu hosi Governu, liña ministériál hanesan Sekretária Estadu Arte Kultura, MTKI, Gabinete Primeiru-Ministru no mós parseiru dezenvolvementu sira-ne’ebé apoiu kontribuisaun sira-ne’ebé la’ós osan, aleinde ne’e setór privadu sira iha rai-laran mós hakarak apoiu.

“Ba atividade ne’e, partisipante sira iha ona konfirmasaun lista ema hamutuk 2.652 mak sei ba, hosi munisípiu sira hamutuk 386 no sira-ne’ebé rejistu ona atu tuir kompetisaun hosi atividade sira-ne’e hamutuk $1.070 ne’ebé rejistu no prontu hakarak partisipa,” nia hateten.

Ho ida-ne’e, Prezidente Repúblika José Ramos Horta agradese tebes no nia fó apoiu tebe-tebes ba ekipa ne’ebé la’o.

“Hosi ne’e, hetan mós orientasaun balun hosi Xefe Estadu no mós hetan apoiu hosi Primeiru-Ministru, Taur Matan Ruak, no mós VIII Governu Konstitusionál nia estrutura tomak fó apoiu makaas. Tanba ne’e, mobilizasaun komisaun organizadora ne’e kompostu hosi liña ministériál sira. Tanba ne’e, Gabinete Primeiru-Ministru reforsa servisu hamutuk ho Gabitene Prezidente Republika nian, ne’ebé iha tempu badak sei iha publikasaun Xefe Estadu ho Xefe Governu rasik mak sei konvida liuhosi video ne’ebé ita grava depois fó sai aviza ba hotu-hotu, la’ós hotu-hotu sei ba maibé pelumenus ita akompaña, katak munisípiu Ataúro ne’e agora sai munisípiu ne’ebé hetan prióridade tinan ida-ne’e,” nia dehan.

Munizípiu Ataúro primeira-vés sai eleva ninia nivél administrativu hosi postu administrativu ba munisípiu nia mós hetan atensaun hosi mundu internasionál atu hotu-hotu promove Timor-Leste nia kultura no mós arte Timor nian, ne’ebé hahú husi Ataúro.

Kona-ba totál orsamentu ne’ebé prevee ba atividade ne’e, nia informa, totál orsamentu ba atividade ne’e sei menus hosi rihun $500.

“Atividade sira-ne’e hakarak promove ita-nia kultura no identidade ne’ebé dala barak inisiativa hosi naun-finanséiru mak barak. Entaun, ita konsege poupa nia montante ne’e sei menus hosi rihum $500 ka bele liu uitoan ka bele menus uitoan, depende ba atividade seidauk la’o hotu. Maibé, ita sei la gasta to’o millaun tanba inisiativa sira-ne’e ita mós iha apoiu hosi ita-nia Autoridade Ataúro ne’eba sira mós apoiu parte balun. Tanba ida-ne’e la’os buat ida-ne’ebé mak sei presiza kustu boot, tanba ne’e integra kedan ona iha orsamentu Ministéiru sira ida-idak nian ne’ebé ita mobiliza,” nia esplika.

Koordenadór Festivál Múzika no Kutura iha Ataúro, Azevedo Marçal, informa ekipa Komisaun Organizadora atualiza ona ba Prezidénte Repúblika kona-ba progressu servisu no preparativu sira no mós hetan aprovasaun no orientasaun hosi Prezidénte Repúblika kona-ba preparativu sira-ne’ebé la’o ona ne’ebé atividade ne’e sei realiza iha loron 21 to’o 24 novembru 2023.

Notísia Relevante: Prezidénsia Repúblika sei realiza festivál kultura-desportu iha Ataúro

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!