DILI, 14 outubru 2022 (TATOLI)—Ministériu Ensinu Superior, Siénsia no Kultura (MESSK) liuhosi Sekretáriu Estadu Arte no Kultura (SEAK), aloka osan $20.000 ba realizasaun festivál kulturál ba loron nasionál kultur iha illa Ataúro.
Notísia Relevante: Festivál múzika no kultura iha Atauro, sei promove TL ba mundu
“Orsamentu ne’ebé alokadu ba loron nasionál kultura ho totál osan $20.000 ne’e, ita aloka ba festival ne’ebé hala’o hamutuk ho Prezidente Repúblika, José Ramos Horta, iha illa Ataúro,” Diretór Jerál Arte no Kultura, Manuel Ximenes Smith, hateten iha konferénsia imprensa, iha komemorasaun loron nasionál kultura ba dala-VIII ho tema “Ita promove, prezerva, no valoriza identidade kulturál hodi hametin paz no estabilidade no kontribui ba prosesu dezenvolviementu nasionál,” iha SEAK, Avenida Portugál (anterior Praia dos Coqueiros), Dili, sesta.
Iha festivál múzika no kultura ne’e sei aprezenta atividade sira hanesan dansa tradisionál, múzika instrumentál, múzika tradisionál, põezia, akustik, pintura, performance ba aiknanoik sira, fashion show ba tais Timor, soru tais no tein hahán tradiosionál no internasionál, feira do livru no Marcha do moradór sira.
Programa ne’e atu la’o ho susesu mak daudaun ne’e koordena no servisu hamutuk ho Palásiu Governu, Ministériu Turizmu Komérsiu Indústria, Sekretariu Estadu Arte no Kultura, SEKOMS, Sekretariu Estadu Protesaun Sivíl, Ministériu Saúde, Ministériu Administrasaun Estatál (MAE), Universidade sira no seluk tan.
Notísia Relevante: GPR no GPM sei realiza festivál Ataúro iha novembru 2022
Jornalista : Osória Marques
Editór : Cancio Ximenes
