DILI, 13 outubru 2022 (TATOLI)–Gabinete Prezidente Repúblika (GPR) no Gabinete Primeiru-Ministru (GPM) sei realiza festivál Ataúro iha novembru 2022, ne’ebé hanesan idea no inisiativa hosi Prezidente Repúblika, José Ramos Horta, hodi kontinua promove turizmu, kultura no páz iha Timor-Leste.
“Komisaun organizadora daudaun ne’e haree hela ida-ne’e. Parseria entre Gabinete Prezidente Repúblika no ha’u-nia gabinete mak lidera hela ida-ne’e. Tuir konversa ha’u ho Prezidente katak eventu ne’e muda fali hosi loron-20 ba oin iha fulan-novembru, antes ne’e deside ona loron 14 novembru maibé prátikamente hosi loron 01 to’o 20 novembru ne’e Governu tomak ho Parlamentu okupadu tebes,” Primeiru-Ministru (PM), Taur Matan Ruak, hateten hafoin ramata reuniaun semanál ho Prezidente Repúblika, iha Palásiu Prezidensiál, Bairru-Pité, kinta ne’e.
Notísia relevante: Prezidénsia Repúblika sei realiza festivál kultura-desportu iha Ataúro
Nune’e, Xefe Governu konsidera inisiativa hosi Prezidente Repúblika ne’e di’ak hamutuk Governu partisipa ativamente iha inisiativa sira ne’e di’ak tebes tanba ajuda movimentu sidadaun no movimentu sira kona-ba kultura nian.
“Eventu festivál ne’e sei realiza durante loron-lima iha Ataúro, iha fulan-novembru tinan ne’e,” nia akresneta.
Jornalista : Antónia Gusmão
Editora : Julia Chatarina
