OÉ-CUSSE, 14 novembru 2022 (TATOLI) – Eminénsia Kardeál Don Vírgilio do Carmo da Silva, SDB, segunda ne’e halo inagurasaun ba kapela Santa Maria Magdalena Maquelab, parókia Nossa Senhora Dorosariu Numbei, ne’ebé lokaliza iha suku Taiboko, sub-rejiaun Pante Makasar Rejiaun Administrativa Espesiál Oé-Cusse Ambeno.
Iha omília durante dirije misa, Kardeál Don Vírgilio do Carmo da Silva, agradese ba kontribuisaun sarani sira tanba bele hari fatin sagradu altar lulik nian hodi hahí Maromak nia naran, nu’udar sarani Katólika iha Timor-Leste.
“Ohin, ita sarani Maquelab, parókia Numbei ninian, ita halibur hamutuk atu haksolok tanba razaun rua, primeiru ohin ita inaugura kapela Santa Maria Magdalena, kapela ne’e iha tinan haat liubá, ha’u liuhosi ne’e sempre mai observa, no ohin sai realidade ida ba ita hotu bele halbur hamutuk tanba ita bele haree kapela ne’e fatin di’ak ona, atu ita halibur hodi halo ita-nia orasaun ba Maromak,” Kardeál Don Vírgilio do Carmo da Silva SDB subliña.
Dirijente Igreja Kátolika ne’e esplika, inagura uma kreda ne’e signifika konvida sarani sira atu hanoin hikas kona-bá natureza, saida mak uma kreda, no saida mak kapela.
“Ohin iha primeira leitura ko’alia kona-bá fatin ida, husi-ne’ebé, bee-matan sulin ne’e Maromak ninian, Maromak ninia grasa no bee-matan mak saida, altar lulik ne’e, orsida sei dedika, tanba igreja sai hanesan kapela, fatin ne’ebé lulik sai sentru ba ita mak altar lulik ne’e,” nia katak.
Tuir nia, tanba altar lulik ne’e maka, bainhira sarani sira oferese ofertóriu lori tua ho paun, tua ne’ebé foti hosi uvas, paun ne’ebé mai hosi terigu, orsida iha altar ne’e, liuhosi amu lulik sira-nia liman, tua ne’e maka ita nakfilak ba Kristu nia futar raan no paun nakfilak ba Kristu nia futar isin.
Tán ne’e liuhosi Kristu nia futar isin no raan ne’e mak sai bensaun ba sarani sira, sarani mai misa, simu Kristu nia futar isin no simu Kristu nia futar raan maka eukarístia iha misa.
“Misa ne’e saida, ita sarani servisu semana ida isin kolen loron ida iha oras rua, ita mai iha Maromak nia uma, rona Maromak-Nia liafuan hosi padre sira, rona padre sira esplika Maromak nia liafuan hosi altar ne’e, ita simu Kristu nia futar isin no raan hanesan ai-haan ba ita-nia isin no ai-haan ba ita-nia klamar,” nia fó hanoin.
Xefe suku Taiboko, Joaquim Tafin, agradese ba sarani sira iha suku Taiboko, tanba konstrusaun ba kapela Santa Maria Magdalena Maquelab konstrui hetan apoiu solidariedade mai hosi hosi sarani sira iha suku Taiboko.
Notísia relevante: Sarani Oé-Cusse entusiazmu simu Kardeál Virgílio ho tradisaun kulturál
Jornalista : Abílio Elo Nini
Editór : Evaristo Soares Martins
