OÉ-CUSSE, 14 novembru 2022 (TATOLI) – Eminénsia Kardeál Don Virgílio do Carmo da Silva, apela ba sarani sira iha Rejiaun Administrativa Espesiál Oé-Cusse Ambeno (RAEOA), tanba misaun relijiaun Katólika tama iha Timor-Leste hahú hosi Lifau.
“Odamatan Kristianizmu ninian ba Timor-Lorosa’e maka hahú iha Lifau Oé-Cusse, ne’e maka sarani Oé-Cusse tenke orgullu, tanba hosi ne’e mak iha tinan 500 liubá ne’e fiar sarani tama hosi Lifau mak ba rai boot no rai ketan sorin iha Dili, sei la tama hosi ne’e karik, iha-ne’ebá ohin loron ita seidauk rekoñese sarani ne’e,” Kardeál Don Virgílio do Carmo da Silva, SDB, ko’alia iha omília bainhira dirije misa iha kapela Maquelab, Oé-Cusse, segunda ne’e.
Dirijente Igreja Katólika Timor-Leste afirma, ne’e duni iha tinan 500 liubá, iha Lifau simu misionáriu sira-ne’ebé lori fiar Katóliku.
“Sira hatene katak misionáriu sira-ne’e lori mai ita Maromak ida-ne’ebé la’ós mai hosi ema mak halo, maibé Maromak ida-ne’ebé hatudu duni nia-aan, Maromak ida-ne’ebé mai moris no Maromak ida-ne’ebé mate no moris hias fali, ida-ne’e mak sai ita-nia fiar,” nia katak.
Iha tempu Portugés nia ukun tinan 450, tama to’o Indonésia nia ukun tinan 24 nia laran, agora ukun rasik-an tinan 20 ona, sei la’ós tanba ita-nia Nai Jesus Kristu, ita bele dehan katak fiar Katóliku ohin loron adeus.
“Tan ne’e sarani Oé-Cusse tenke hakbesik beibeik ba Maromak ni uma iha, domingu, domingu tenke tama misa atu husu bensaun hosi Nai Jesus Krsitu, hodi fo ita dame pás atu ita moris ho saudável lori ita-nia rai ne’ebé sosa ho ruin no raan ba nasaun ida prósperu nasaun dame nian iha mundu,” nia apela.
Tanba bainhira katekista mate, padre no madre mate, bispu mate hotu ona, maibé Igreja Katólika, la’ós depende ba katekista ho amu lulik sira, la’e. Hirak-ne’e hotu instrumentu ne’ebé Maromak hili atu hola parte iha misaun uma kreda ninian, iha istória tinan 500 evangelizasaun Igreja Timor-Leste ninian.
Notísia relevante: Kardeál Don Vírgilio inaugura kapela Santa Maria Magdalena iha Pante Makasar
Jornalista : Abílio Elo Nini
Editór : Evaristo Soares Martins
