iklan

DILI, POLÍTIKA

PN aprova OJE 2023 ba MKAE iha espesialidade ho votu a-favór 37

PN aprova OJE 2023 ba MKAE iha espesialidade ho votu a-favór 37

Osan Dolar Amérika. Imajen/Espesiál

DILI, 14 novembru 2022 (TATOLI)—Deputadu sira iha Parlamentu Nasionál (PN) aprova proposta Orsamentu Jerál Estadu (OJE) 2023 iha espesialidade ba Ministéiru Koordenadór Asuntu Ekonomiku (MKAE) ho votu a-favór 37 kontra 0 no abstensaun 19.

“Nune’e Orsamentu Jerál Estadu (OJE) 2023 ba Ministéiru Koordenadór Asuntu Ekonomiku (MKAE) aprovadu,” Prezidente PN, Aniceto Longuinhos Guterres Lopes, hateten iha  ambitu debate proposta OJE 2023 faze espesialidade ba loron datoluk iha sala plenária, segunda ne’e.

Iha proposta Orsamentu Jerál Estadu (OJE) 2023 ne’e, Ministéiru Koordenadór Asuntu Ekonomiku (MKAE)  prevee ho montante $2,371,445.

Ba tinan oin, MKAE iha programa boa-governasaun no jestaun instituisionál prevee $857,831 ho sub-programa ida no atividade haat.

Programa investimentu no diversifikasaun ekonómika prevee $1,513,614  ho sub-programa polítika ekonómia ho atividade mak hanesan monitorizasaun negósiu ki’ik rurál finansia liuhosi subvensaun públika, koordenasaun polítika departamentu ministeriál no ajénsia tutela, koordenada monitoriza no avalia implementasaun planu rekuperasaun ekonómika, reforma ambiente negósiu, dezenvolvimentu no kapasitasaun setór privadu iha área ekonómika no institui instrumentu apoiu finansiamentu mikro, ki’ik, médiu no boot empreza sira, koordena no akompaña serbisu no polítika governamentál dezenvolvimentu setór privadu ho kooperativa, desiminasaun informasaun atividade ekonómika.

Sub-programa diversifikasaun ekonómika ho atividade koordenasaun no sosializasaun dezenvolvimentu komérsiu, asegura koordenasaun serbisu integrasaun iha ASEAN iha setór ekonómiku, promove polítika diversifikasaun ekonómika, promosaun no koordenasaun kadeia valór.

OJE 2023 ba MAPKOMS aprovadu

PN aprova aprova proposta OJE 2023 ba Ministéiru Asuntu Parlamentár no Komunikasaun Sosiál (MAPKOMS), iha espesialidade ho votu a-favór 40, kontra 0 no abstensaun 21.

Ba 2023 MAPKOMS iha programa garante liberdade espresaun no asesu informasaun ho sub-programa deseminasaun informasaun kona-ba asaun Governu iha programa dezenvolvimentu, ho atividade peskiza index públiku asesu ba meiu komunikasaun sosiál, fortalesimentu servisu komunikasaun sosiál no informasaun Governu, disemina informasaun programa Governu dezenvolvimentu ba públiku iha nível nasionál, munisipál no komunitária no Governu iha povu nia leet (Naroman ba suku).

Sub-programa enkorajementu diversifikasaun meiu komunikasaun sosiál, ho atividade propor politika no elabora lejislasaun iha área komunikasaun sosiál, promove diversifikasaun ba meiu komunikasaun sosiál iha nível munisipál, formasaun téknika iha komunikasaun, konstrusaun torre RTTL hamutuk 12, sei halo iha área Naunil, Codo, munisípiu Lautém, Monte Perdidu iha Viqueque, Hobonaro-Ainaro, Lalimlau iha Ermera, Tapo Tas iha Maliana, Oé-Cusse, Manatuto, Manufahi, Balibo, Maliana no Covalima.

Atividade seluk, fortalese relasaun ho organizasaun media no grupu komunitáriu, fortalesimentu rádiu komunidade, promosaun no konsilidasaun papel RTTL.

Programa boa-governasaun no jestaun institusionál, ho sub-programa boa-governasaun no ho nia atividade planeamentu dezenvolvimentu estrátegiku no orientasaun politika, inspesaun, fiskalizasaun no auditória, koordenasaun ba asuntu parlamentár.

Sub-programa, jestaun institusionál, ho atividade jestaun finanseira, administrasaun no lojistika, planeamentu monitórizasaun no estatistika.

Atividade seluk, jestaun ba rekursu umanu, formasaun no kapasitasaun ba rekursu umanu, aprovizionamentu no jestaun ba kontratu.

OJE 2023 ba SEA pasa

PN mós aprova proposta OJE 2023 ba Sekretária Estadu Ambiente (SEA) ho votu a-favór 40,  kontra 0 no abstensaun 21.

SEA prevee OJE 2023 ho montante $5.578.236 ho programa rua boa-governasaun no jestaun instituisionál prevee $1.569.880 ho programa protesaun no konservasaun ambiente $2.008.356.

Entertantu iha debate proposta OJE ba instituisaun tolu ne’e laiha proposta nune’e deputadu sira avansa de’it ba votasaun.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!