iklan

INTERNASIONÁL, DESPORTU, HEADLINE

Prezidente FFTL Francisco Jerónimo eleitu nu’udar Vise-Prezidente AFF

Prezidente FFTL Francisco Jerónimo eleitu nu’udar Vise-Prezidente AFF

Vise-Prezidente AFF eleitu, Francisco Martins da Costa Pereira Jerónimo (liman loos) iha ámbitu kongresu AFF, iha kambódia, segunda (14/11). Imajen/Espesiál

DILI, 14 novembru 2022 (TATOLI)–Prezidente Federasaun Futeból Timor-Leste (FFTL) no atuál Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, segunda ne’e, eleitu nu’udar Vise-Prezidente ASEAN Football Federation (AFF) ba períodu 2022-2026, iha Kambódia.

Vise-Prezidente eleitu, hateten, prosesu ne’e normál hanesan nomeasaun Federation International Football Association (FIFA),  Asian Football Confederation  (AFC), ne’ebé AFF mós hanesan bainhira iha kongresu ba eleisaun.

“Bainhira presiza kandidatura, hosi Timor-Leste nia, nu’udar Prezidente FFTL, entaun ha’u kandidata-an nu’udar Vise-Prezidente no segunda ne’e kandidatura ne’e hetan aprovasaun hodi eleitu ba Vise-Prezidente AFF. Ha’u sente onradu tanba nasaun membru ASEAN hotu bele fó apoia ba ha’u hodi sai Vise-Prezidente, espetativa ba oin maka tenke serbisu maka’as atu nune’e hakbiit futeból iha Timor-Leste. Agora ne’e ha’u hanoin hela oinsá haree ba infraestrutura, tanba ita-nia estádiu ka kampu ruma seidauk di’ak, ita presiza kampu di’ak nune’e jogadór di’ak sira bele treina hodi joga di’ak liután,” Francisco Jerónimo informa ba Agência Tatoli, via telefónika, segunda ne’e.

Notísia relevante: Mouzinho de Lima prontu reforsa selesaun nasionál iha jogu AFF Mitsubishi

Nune’e, estrutura AFF períodu 2022-2026 kompostu hosi Prezidente AFF, Khiev Sameth hosi Kambódia, inklui ninia vise na’in-tolu hanesan Vise-Prezidente, Pengiran Matusin bin Pengiran Matasan hosi Brunei Darussalam, Maaike Ira Puspita hosi Indonesia, no Francisco Martins da Costa Pereira Jerónimo hosi Timor-Leste.

“Ami hala’o knaar hanesan Vise-Prezidente hodi koajuva Prezidente Sameth iha nia serbisu loron-loron, relasiona ho serbisu AFF nian. Kritéria hanesan baibain, ne’ebé dahuluk presiza ema ne’ebé ativu iha bola hanesan mós Prezidente sira seluk iha nasaun Ázia ninian, hafoin halo aprezentasaun kandidatura mai, iha ne’e komité eleitorál maka haree, kuandu elezível no loos hotu ona maka lori ba kongresu atu halo votasaun no eleje kandidatura sira ne’e atu nune’e hola parte iha estrutura AFF,” nia esplika.

Kada tinan haat AFF nakloke atu membru hotu bele kandidata-an, tanba ne’e hosi parte Timor-Leste propoin Francisco Jerónimo.

“Hosi federasaun, aprezenta ha’u-nia an hanesan kandidatu no hetan apoia hosi nasaun sira seluk hodi ikus mai eleisaun ne’e bele hili ha’u hanesan Vise-Prezidente,” nia tenik.

Vise-Prezidente eleitu, komprometidu sei serbisu hamutuk ho Prezidente no estrutura hodi haree programa sira.

“Liu-liu oinsá maka futeból iha sudeste aziátiku bele la’o di’ak no nasaun sira ne’ebé presiza fó asisténsia, atu nune’e foteból bele la’o hanesan iha parte hotu. Pontu pozitivu ida tanba ha’u bele sai ponte ida ba Timor no mós ba AFC no FIFA, nune’e fasil liután tanba hanesan mós Vise-Prezidente AFF,” nia adianta.

Jornalista   : Antónia Gusmão

Editora        : Julia Chatarina  

iklan
iklan

Leave a Reply

iklan
error: Content is protected !!