DILI, 19 outubru 2022 (TATOLI) – Eis jogadór Klube Timor -Leste AD SLB Laulara, Boavista FC Timor no atuál jogadór klube Kamboja Ankor Tiger FC, Mouzinho Barreto de Lima, hateten prontu nafatin reforsa selesaun nasionál seniór iha jogu kualifikasaun Asian Football Federation (AFF) Mitsubishi 2022, ne’ebé sei hala’o iha novembru, hodi kontra Brunei.
Atu reforsa selesaun nasionál, nia dehan sei husik klube Ankor Tiger FC-Kamboja, iha loron 26 outubru ne’e, hodi fila hikas mai Timor -Leste, atubele treinu hamutuk ho nia-amigu sira, nune’e bele kompete iha jogu kualifikasaun AFF ne’e.
“Atu tama iha selesaun ka la’e maibé iha 26 outubru, ha’u sai hosi ne’e to’o iha Timor -Leste iha loron 28 outubru, hakarak lakohi treinadór sira bolu ona ha’u, ha’u nafatin prontu atu joga tanba defende nasaun no lori ha’u nia nasaun ne’e, ha’u pronto kualkér tempu,” dehan Mouzinho ba Agência TATOLI via media WhatsApp, kuarta ne’e.
Liga futeból iha Kamboja nian hotu iha semana ne’e nia laran no sei kontinua fali tinan-oin, nune’e iha tempu atu nia mai reforsa selesaun nasionál.
“Liga hotu semana ne’e, entaun ha’u fila atu ferias no joga iha selesaun, kona-ba kontratu atu hamutuk nafatin ho klube Ankor ou lae, seidauk iha desizaun tanba ha’u seidauk deside, depois mak haree took,” nia tenik.
Jogadór Timór-oan ne’e, asina kontratu ho klube Angkor Tiger FC iha loron 31 maiu, ho durasaun kontratu too dezembru tinan ne’e, tuir durasaun liga Cambodia nian.
Mouzinho sei reforsa klube Angkor Tiger FC iha pozisaun Playmaker ou joga livre iha kampu klaran ne’ebé tuir duni nia-pozisaun ne’ebé daudaun iha selesaun nasionál hanesan avansadu prinsipál,maibé númeru kamizola mak klube Cambodia ne’e seidauk deside.
Posizaun Playmaker hanesan jogadór ne’ebé kontrola lala’ok jogu iha ekipa no dala barak envolve iha momentu ofensivu no defensivu hodi hatama golu, liuhosi vizaun, téknika, kontrola bola, kreatividade no abilidade passa.
Biodata badak
Jogadór Mouzinho, moris iha Maliana, 26 juñu 2002. Oan hosi Mario de Lima no Adelina Barreto. Nia hanesan oan ikun hosi maun alin na’in-neen, kompostu hosi feto tolu no mane tolu.
Mouzinho hahú nia estudu Pre-Primária iha 2004 too 2005. tama iha Ensinu Primaria iha tinan 2006 too 2011 no iha tinan 2013, tama Ensinu Pre-Sekundáriu Santa Madalena de Canossa Haslaran Dili, iha klase primeira de’it, Madre sira deside hasai nia tanba la tuir ezame.
Nune’e, jogadór ne’e deside ba kontinua fali nia Eskola Pre-Sekundáriu iha Cristal Dili, hafoin ramata kontinua kedan ba Eskola Ensinu Sekundáriu FINANTIL-Dili no daudaun nia eskola hela iha Universidade Nasionál Timor-Lorosa’e (UNTL).
Tama iha mudu futeból la’ós ema ida mak obriga, maibé ho vontade rasik tanba nia aman mós hanesan futebólista, maibé ladun másimu tanba dalabarak liu mete iha Boxe.
“Uma laran ha’u mesak de’it mak tama iha futeból seluk laiha hotu, ha’u nia papa jogadór bola hotu, maibé ladun tanba nia mete barak liu iha Boxe,” nia informa.
Notísia relevante: Klube futeból Kamboja “Angkor Tiger FC” kontrata ona jogadór Mouzinho de Lima
Jornalista: Hortencio Sanchez
Editór : Florencio Miranda Ximenes
